Sulo: Opozita, veçse të bashkëpunojë, duhet të gjejë një sistem që mos zhvillojë interesin e PS

Në emisionin “Trialog” të Alba Alishanit në RTSH1, analisti Arion Sulo u shpreh se negociatat për ndryshimin e sistemit zgjedhor vazhdojnë të kenë vështirësi të mëdha brenda opozitës, duke paralajmëruar se pa unitet të vërtetë dhe reformim të thellë të partive, çdo ndryshim formal mund të përfundojë në dëm të spektrit opozitar.

Sulo tha se “grupi i zotit Ermal Hasimja ka negociuar me disa parti opozitare, por “Lëvizja Bashkë” e Arlind Qorit dhe partia e Dashamir Shehit nuk kanë shprehur dakordësi me nismat në diskutim”

Sulo u ndal gjatë te çështja e pragut elektoral 4% dhe simulimeve të ndryshme.

“Në qoftë se shkojmë te varianti i proporcionalit kombëtar me prag 4%, me lista të hapura, PS-ja mbetet me rreth 83 mandate”, tha Sulo.

Ai theksoi se pyetja themelore nuk është vetëm formula zgjedhore, por bashkëpunimi: “Pse nuk bashkëpunojmë? Kush është interesuar realisht? Prova u bë në 2025-ën. Me shtatë parti opozitare në këtë sistem është absurde të futesh.”

Sulo vuri në dukje se mosmarrëveshjet dhe komplekset e brendshme po minojnë mundësinë e një fronti të përbashkët opozitar.

“Opozita duhet t’i gjejë, përveç se të bashkëpunojë mirë, përveç se t’i rinovojë, duhet t’i gjejë një sistem që mos të hajë interesin, mos të bëjë interesin e PS-së”, nënvizoi Sulo.