Surprizë pas zgjedhjeve në Serbi: N1 dhe Nova S do të transmetohen përmes Telekomit dhe Yettelit

Siç njofton portali N1, bordi i drejtorëve të ANN Serbia njoftoi se Nova S dhe N1 në Serbi do të jenë të disponueshme përmes Telekom Srbija dhe Yettelit. Bordi tha se që kur mori përgjegjësinë për këto kompani ka punuar intensivisht për të siguruar shpërndarjen sa më të gjerë të kanaleve, dhe se negociatat me operatorë të tjerë vazhdojnë ende.

Sipas njoftimit të bordit të ANN Serbia, që e përcjell N1, do të investohet në përmbajtje të reja vendase, filmike dhe argëtuese për Nova S, përfshirë sezone të reja të “Survivor” dhe formate të tjera të njohura ndërkombëtarisht. Investimet totale në Nova S gjatë vitit 2027 pritet të kalojnë 11,3 milionë euro.

Planet e investimeve dhe të ndryshimeve organizative për N1 dhe segmentin më të gjerë informativ do të shpallen në javët në vijim, pas konsultimeve me përfaqësuesit e sindikatave, thuhet në njoftim.

ANN synon ta forcojë N1 si kanalin kryesor informativ në Serbi dhe Nova S si zgjedhjen e parë të publikut për program argëtues. Edhe Danas, Radar dhe Forbes do të forcohen, do t’i mbajnë botimet e shtypura, do të përmirësojnë platformat digjitale dhe do të fusin abonime digjitale premium.

Bordi deklaroi se beson në Serbi, në forcën dhe vendosmërinë e qytetarëve të saj, në institucionet dhe demokracinë e saj, si dhe në të ardhmen e Serbisë si anëtare e plotë e Bashkimit Evropian.