Brnabiç thërret tubim të mërkurën para REM-it: mbrojmë lirinë e mediave, të fjalës dhe të mendimit

Nënkryetarja e Bordit Kryesor të Partisë Progresiste Serbe (SNS), Ana Brnabiç, deklaroi të martën në mbrëmje se të mërkurën para Këshillit të Trupit Rregullator për Mediat Elektronike (REM) në Beograd “mbrohet liria e mediave, liria e fjalës dhe e mendimit në Serbi”, duke i ftuar qytetarët në tubimin e njoftuar për në orën 10:45 në Sheshin Nikolla Pashiq, siç njofton agjencia Tanjug.

Tubimin e ka njoftuar Shoqata e Gazetarëve të Serbisë (ANS), e cila ftoi gazetarët, punonjësit e mediave dhe qytetarët të ngrenë zërin kundër përpjekjeve për mbylljen e mediave, me mesazhin se liria e mediave u përket të gjithëve ose nuk ekziston.

Tubimi mbahet pak para seancës së rregullt e publike të Këshillit të REM-it, të caktuar për në orën 11:00, në rendin e ditës të së cilës është iniciativa e 32 organizatave të shoqërisë civile dhe shoqatave mediatike për heqjen e licencës së transmetimit të TV Informer.

Kryetari i Këshillit të REM-it, Stevica Smederevac, ka deklaruar se i ka dhënë urdhër shërbimit të mbikëqyrjes dhe analizës të mbledhë të gjitha ankesat që lidhen me atë medium dhe t’i krahasojë ato me pretendimet e paraqitura në iniciativë.

Në deklaratën e saj, Brnabiç pretendoi se mbyllja e mediave në Serbi do të niste menjëherë me një qeveri të Listës Studentore, ndërsa tubimi i së mërkurës, sipas saj, është mbrojtje e lirisë së shprehjes.