Tahiri: Mungesa e adresave, shteg për manipulim në zgjedhje

Mungesa e adresave të sakta të qytetarëve ka qënë një shteg për manipulim të zgjedhjeve, është shprehur ministri i Brendshëm Saimir Tahiri në prezantimin e projektit për regjistrin e adresave.

“Ju shumë mirë e dini që në lista zgjedhore jeni mësuar gjithë këto kohë të keni kodin specifik, 999. Ata janë shtetasit që janë në listën zgjedhore, po nuk dihet ku banojnë. Jemi mësuar gjithë këto kohë të dimë kanë njerëz të identifikuar që votojnë në këtë kuti, ka njerëz të identifikuar në letër, që duhet të votojnë në këtë kuti. Se janë emigrantë apo jo, se janë njerëz që u ka ngelur banesa në letra te ajo qëndër votimi, po janë në qyteti tjetër. Se janë njerëz që nuk ekzistojnë, kjo nuk dihet. Kjo cënon parimet e sistemit zgjedhor, barazinë e votës së qytetarëve dhe ka shërbyer si shteg për manipulimin e zgjedhjeve, me shtetas që ekzistojnë vetëm në listë por jo në territor”, tha Tahiri.

Shumë zona në Shqipëri janë të pandriçuara nga dija institucionale dhe shtetërore, tha ministri, pasi ka munguar procesi për pasurimin e të dhënave. Deri më sot dihen të dhëna deri në vitin 2007. Por kjo për ministrin, ndikon në kapacitetin e institucioneve për të dhënë shërbim qytetarëve.