Takimi sekret Kotzias-Dimitrov, negociatat për emrin në “Makedonia Palace”
Takimi është mbajtur në kuadër të dialogut të rregullt dhe konsultimeve midis dy vendeve, për të rritur transparencën dhe besimin reciprok në marrëdhëniet dypalëshe.
Ministrat kanë shprehur dëshirën e tyre të përbashkët që të presin takimin e 17 janarit në Nju Jork, midis negociatorit të OKB-së, Matthew Nimetz, dhe përfaqësuesve të Greqisë dhe Maqedonisë, që do të paraqesin një kuadër fillestar brenda të cilit do të promovohet procesi për gjetjen e një emri të pranueshëm nga të dyja palët.
Ata ranë dakord gjithashtu të ndërmarrin një rol më aktiv në diskutimet për të kapërcyer mosmarrëveshjet për çështjen e emrit që ndajnë dy vendet për më shumë se 27 vite.
Ndërkohë, kreu i partisë së koalicionit qeveritar, njëkohësisht ministër i Mbrojtjes, Panos Kamenos është shprehur përsëri hapur se nuk do të jetë kurrë dakord që termi “Maqedonia” të jetë pjesë e emrit të fqinjit verior të Greqisë, duke propozuar edhe emrin e ri, Vardarska.
Orët e fundit, qarqe të Ministrisë së Jashtme në Athinë i janë përgjigjur edhe ndërhyrjes së Kishës Greke në çështjen e emrit, duke theksuar se me këtë veprim lihet përshtypja sikur Sinodi i Shenjtë kërkon të jetësohet me konceptet neonaziste të Agimit të Artë.
Ndërsa me tone më të ulëta, kryeministri grek Alexis Tsipras i është përgjigjur kryepeshkopit grek Ieronimos se, përgjegjëse për zgjidhjen e çështjes së emrit të ish-Republikës Jugosllave të Maqedonisë është vetëm qeveria.
