Të hënën mblidhet Kryesia e Kuvendit, në rend dite seanca plenare dhe Bordi i RTK-së
Mbledhja nis në orën 11:00. Përveç rendit të ditës së seancës së radhës plenare, Kryesia do të shqyrtojë formimin e Komisionit Ad-hoc për përzgjedhjen e anëtarëve të Bordit të RTK-së dhe propozimin e Listës Serbe për deputetët në komisionet parlamentare.
Zyra e Kuvendit të Kosovës ka njoftuar se të hënën, duke filluar nga ora 11:00, do të mbahet mbledhja e Kryesisë së Kuvendit, siç njofton Klan Kosova.
Pika kryesore e rendit të ditës është propozimi i rendit të ditës për seancën e radhës plenare. Sipas njoftimit, seanca plenare do të përfshijë miratimin e procesverbalit të seancës së mëparshme, deklarimet jashtë rendit të ditës dhe pyetjet parlamentare.
Në mbledhje do të shqyrtohet edhe formimi i Komisionit Ad-hoc për përzgjedhjen e kandidatëve për Bordin e Radiotelevizionit të Kosovës. Komisioni do të përzgjedhë dy anëtarë nga komuniteti shqiptar, një anëtar nga komuniteti serb dhe një anëtar nga komunitetet joshumicë.
Pikë tjetër e rendit të ditës është votimi i propozimit të Grupit Parlamentar të Listës Serbe për emërimin e deputetëve në komisionet parlamentare. Kryesia do të shqyrtojë gjithashtu propozime dhe kërkesa të tjera, pasi të miratojë procesverbalet e mbledhjeve të mëparshme.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.