Të shtëna me armë zjarri në agim në Pangrati të Athinës, tre të rinj arrestohen

Të shtëna me armë zjarri u dëgjuan në agimin e së martës në lagjen Pangrati të Athinës, pas një episodi në hapësirën e përbashkët të një pallati, siç njofton Skai, duke cituar policinë greke. Tre të rinj u arrestuan në vendngjarje, ndërsa policia gjeti dhe sekuestroi një armë zjarri.

Sipas raportimit, rreth orës 00:50 në rrugën Vasileiou Laskou, një banor i pallatit dëgjoi zhurmë dhe njoftoi qendrën e Ndërhyrjes së Shpejtë. Efektivët që mbërritën me shpejtësi në vendngjarje gjetën në bodrum një gëzhojë dhe dy predha, ndërsa në hapësirën e hapur të pallatit u gjet një pistoletë.

Siç raporton Skai, shumica e personave të përfshirë në episod ishin larguar para mbërritjes së policisë, por u arrestuan tre të rinj — 18, 19 dhe 20 vjeç — të cilët u ngjitën në tarracën e pallatit për t’u arratisur. Sipas informacioneve, ata janë me origjinë shqiptare dhe posedojnë dokumente identiteti greke.

Ndaj 19-vjeçarit është ngritur akuzë për tentativë vrasjeje, ndërsa dy të tjerët akuzohen për bashkëpunim. Hetimi paraprak për rastin po kryhet nga Nëndrejtoria e Ndjekjes dhe Zbardhjes së Krimeve të Athinës (YDEEA). Autoritetet po shqyrtojnë gjithashtu nëse ndonjë nga personat që u arratis mund të jetë plagosur nga të shtënat. Ngjarja është raportuar edhe nga ProtoThema, ERT dhe Naftemporiki.