Telashe për Simeone, rrezikon të jetë pa dy titullarë të dëmtuar në gjysmëfinalen e kthimit

Kambanat e alarmit bien tek Atlético Madrid pas barazimit 1-1 ndaj Arsenal në gjysmëfinalen e parë të Champions League. Problem nuk është vetëm ndeshja e kthimit, por edhe kriza e dëmtimeve.

Situata është bërë kritike orët e fundit. Ekipi i Diego Simeone është përballur tashmë me mungesat e Pablo Barrios dhe Nico González, përveç problemeve fizike të Alexander Sorloth, i cili nuk ishte në formën e tij më të mirë dhe u detyrua të humbiste ndeshjen.

Gjatë gjysmëfinales së parë, dy zëvendësime të tjera i ndërlikuan më tej planet e El Cholo. sulmuesi Julián Alvarez u detyrua të largohej nga fusha pas një përplasjeje të fortë me Eze, duke i lënë vendin Baena.

Gjërat nuk shkuan më mirë edhe për Giuliano Simeone, i cili u zëvendësua në pushimin e pjesës së parë pasi u ankua për shqetësim pas një përplasjeje me Hincapié. Lojtari kishte treguar shenja vështirësie drejt fundit të pjesës së pare.

Pas ndeshjes, Simeone u përpoq t’i qetësonte tifozët: “Giuliano mori një goditje në ije dhe kishte shumë dhimbje. Do t’i bëjmë disa teste Julian për të përcaktuar shkakun, por shpresojmë se nuk është asgjë serioze.”