Tërmeti financiar, bursat në pikiatë pas largimit të Anglisë nga BE
Europa është në shok pas numërimit të votave në 360 nga 382 zona elektorale, ku kryeson qartazi me fushata “Leave”-me, duke mos lënë vend për shpresë e për dyshime.
Ishin profetizuar pasoja nga një shkëputja e njërit prej vendeve më të mëdha e të rëndësishme anëtare të bllokut europian, dhe ato nuk vonuan të mbërrijnë.
Paundi britanik ra nën 1,33 dollarë duke mbërritur vlerën më të ulët prej 30 vjetësh, ndërsa euro ka rënien më të madhe që prej marsit.
Nikkei japonez rrëshqiti dhe ai me 8 p?rqind. Ajo që për liderin e UKIP-it, Nigel Farage ishte vota e ditës së pavarësisë, për tregjet globale ishte tërmet.
Bursat janë përfshirë nga paniku dhe ekspertët frenohen të bëjnë parashikime. Luhatshmëria ishte aq e lartë këtë mëngjes sa bursa e Milanos, siç thotë “Corriere Della Sera”, pezulloi veprimet për më shumë se njëçerek ore.
Kjo nuk kishte ndodhur që nga shtatori i 2008-ës kur falimentoi “Lehman Brothers”. Të tatëpjetën ka marrë dhe bursa e Frankfurtit që u çel në -9,94%, Parisi ishte në rënie me 7%, Londra vetë 8%.
Konfirmohen kështu parashikimet e lëkundjeve të fuqishme që do të sillte në tregjet financiare skenari i Brexit-it, aq frikësues për shumë liderë të bllokut europian.
Shpresat tani varen tek rrjeta e mbrojtjes e premtuar nga bankat qendrore. Guvernatori i Bankës së Japonisë “Haruhiko Kuroda”, sipas agjencisë së lajmeve “Kyodo”, ka garantuar se institucioni që drejton do të bashkëpunojë ngushtë me bankat e tjera qëndrore për të rikthyer stabilitetin në tregje.
E përgatitur duket ishte për këtë situatë dhe Banka e Anglisë, e cila është në kontakte të ngushta me Ministrinë e Thesarit e Autoritetet e tjera të mbretërisë së bashkuar me të cilët po monitoron me kujdes çdo zhvillim.
Gjatë një deklarate televizive, guvernatori i saj Mark Carney pohoi se institucioni financiare nuk do të ngurrojë të marrë masa shtesë në këtë situatë jashtë të zakonshmes e shprehet i gatshëm të garantojë për këtë qëllim fonde shtesë prej 250 miliardë paundësh.
