“The Odyssey”, udhërrëfyesi para premierës

TIRANË, 16 korrik, ATSH/ Pak orë para daljes në kinema të filmit “The Odyssey”, rrjetet sociale janë mbushur me postime që u shpjegojnë shikuesve historinë, personazhet dhe mitologjinë mbi të cilën bazohet filmi. Faqe të njohura të kulturës pop, podkaste dhe media ndërkombëtare po publikojnë guida “Everything you need to know before watching The Odyssey”, duke ndihmuar publikun të hyjë më i përgatitur në universin e Homerit. 

Filmi i Christopher Nolan nuk është thjesht një adaptim i poemës epike të Homerit, por një interpretim modern i një prej veprave më të rëndësishme të letërsisë botërore. Në qendër të rrëfimit është Odiseu (Odysseus), mbreti i Itakës, i cili pas përfundimit të Luftës së Trojës nis një udhëtim dhjetëvjeçar për t’u kthyer në shtëpi, duke u përballur me perëndi, përbindësha dhe sprova që do të vënë në provë zgjuarsinë dhe karakterin e tij. 

Sipas materialeve të publikuara në rrjetet sociale, disa nga personazhet dhe elementët kryesorë që publiku duhet të njohë përpara se të shohë filmin janë:

* Odiseu, mbreti i Itakës dhe heroi kryesor i historisë;
* Penelopa, bashkëshortja që e pret për 20 vjet;
* Telemaku, djali i tyre, i cili rritet pa praninë e të atit;
* Athena, perëndesha që e ndihmon Odiseun;
* Poseidoni, armiku i tij më i madh, i zemëruar pasi Odiseu verbon djalin e tij, Ciklopin Polifem;
* Circe, Kalipso, Sirenat, Skila dhe Karibda, figura mitologjike që shoqërojnë aventurat e heroit gjatë kthimit në Itakë. 

Ndryshe nga poema origjinale, raportet paraprake tregojnë se Nolan ka bërë disa ndryshime në strukturën narrative. Filmi pritet të nisë me episodin e Kalit të Trojës dhe jo me Odiseun në ishullin e Kalipsos, ndërsa rrëfimi do të ndërtohet me stilin karakteristik jo-linear të regjisorit. 

Në rolin e Odiseut interpreton Matt Damon, ndërsa kastit i bashkohen Anne Hathaway (Penelopa), Tom Holland (Telemaku), Zendaya (Athena), Charlize Theron (Kalipso) dhe Robert Pattinson (Antinoi). Filmi është xhiruar në gjashtë vende dhe konsiderohet prodhimi më ambicioz i Nolan deri më sot, duke përdorur kamera IMAX të gjeneratës së re dhe efekte praktike në vend të grafikës kompjuterike sa herë që ka qenë e mundur. 

Ndërkohë, kritikat e para ndërkombëtare e cilësojnë “The Odyssey” si një spektakël vizual me një dimension të fortë emocional, ku temat e luftës, familjes, besnikërisë dhe kthimit në shtëpi mbeten po aq aktuale sa edhe rreth tre mijë vjet më parë.