Thirrja e Ministrit të Drejtësisë për dialog: Institucionet nuk goditen, por sfidohen me argumente

Ministri i Drejtësisë, Toni Gogu, ka reaguar përmes një mesazhi publik lidhur me protestat e zhvilluara së fundmi në Tiranë, duke vendosur theksin te rëndësia e komunikimit, shtetit të së drejtës dhe ruajtjes së integritetit të institucioneve publike.

Në deklaratën e tij në rrjetet sociale, Gogu nënvizoi se pakënaqësitë shoqërore dhe kritikat duhet të kanalizohen përmes mjeteve demokratike dhe jo përmes përplasjeve fizike.

“Institucionet nuk goditen, por sfidohen me argumente dhe dialog!”, shkruan Gogu, duke shtuar se “një mesazh i qartë na kujton se dhuna nuk është zgjidhje. Institucionet mund të kritikohen, të kundërshtohen dhe t’u kërkohet llogari. Por goditja e tyre nuk i zgjidh problemet. Dialogu është rruga për t’i kthyer pakënaqësitë në zgjidhje dhe për të sjellë ndryshim”.

Për të përforcuar këtë qëndrim, Ministri i Drejtësisë ndau edhe vëzhgimet e Leopoldo-s, anëtar i World Jurist Association dhe pjesë e ekipit të World Law Foundation, i cili ka ndjekur nga afër zhvillimet e fundit në kryeqytet.

Përfaqësuesi ndërkombëtar u shpreh se i kupton kërkesat e studentëve për akses më të mirë në arsim dhe mundësi punësimi, por theksoi se respektimi i ligjit është një detyrim dypalësh. Sipas tij, “kur kërkon diçka nga qeveria jote, duhet gjithashtu të marrësh në konsideratë që duhet ta bësh në mënyrën e duhur”.

Në përmbyllje, u nënvizua se institucionet publike u përkasin sovranit dhe se kritika ndaj tyre duhet të shërbejë si një mekanizëm për përmirësimin e qeverisjes përmes argumenteve dhe tryezave të bisedimeve.

Ende nuk ka komente. Bëhuni i pari që komenton.