Akuza për abuzim dhe një betejë për kujdestarinë, Halle Berry dhe ish-bashkëshorti përballen në gjykatë

Përplasja ligjore mes aktores Halle Berry dhe ish-bashkëshortit të saj, Olivier Martinez, po bëhet gjithnjë e më e ashpër.

Aktori francez ka përsëritur akuzat për abuzim ndaj ish-bashkëshortes dhe djalit të tyre 13-vjeçar, Maceo, gjatë seancave gjyqësore për kujdestarinë dhe urdhrin e mbrojtjes.

Gjatë marrjes në pyetje në Gjykatën e Lartë të Los Anxhelosit, Martinez u përball me pyetje nga avokatja e Berry-t, Marina Beck, e cila i vuri në dukje një deklaratë të nënshkruar prej tij në shtator të vitit 2024.

Në atë dokument, të firmosur nën përgjegjësi ligjore për vërtetësinë e deklarimeve, Martinez kishte pohuar se mes tij dhe aktores nuk kishte pasur histori dhune në familje.

Kur avokatja e pyeti nëse deklarata ishte e vërtetë në momentin kur ishte nënshkruar, Martinez u përgjigj pozitivisht. Kjo ngriti pikëpyetje mbi mospërputhjen mes deklarimit të mëparshëm dhe akuzave që ai ka bërë së fundmi.

Megjithatë, avokati i Martinez-it, Patrick Baghdaserians, shpjegoi për Page Six se dokumenti i vitit 2024 lidhej me një kërkesë financiare për mbulimin e shpenzimeve ligjore dhe jo me çështjen e kujdestarisë. Sipas tij, deklarata i referohej mungesës së urdhrave të mëparshëm për dhunë në familje.

Akuzat për incidentin me djalin 13-vjeçar

Martinez pretendon se më 26 shtator, gjatë një konflikti në banesën e aktores, Halle Berry e ka kapur djalin e tyre nga qafa dhe e ka mbytur. Ai pretendon gjithashtu se ngjarja i ka shkaktuar djalit shqetësim emocional.

Pas këtyre pretendimeve, gjykata lëshoi në fillim të tetorit një urdhër të përkohshëm mbrojtjeje, i cili i dha Martinez-it kujdestarinë kryesore të Maceo-s dhe kufizoi kontaktet e Berry-t me të, ndërsa çështja vazhdon të shqyrtohet.

Aktorja i ka mohuar akuzat. Përmes dokumenteve gjyqësore, ajo ka deklaruar se nuk e ka abuzuar kurrë fizikisht apo emocionalisht të birin dhe ka kërkuar rikthimin e marrëveshjes së mëparshme për kujdestari të përbashkët.

Berry ka akuzuar gjithashtu ish-bashkëshortin se ka ndërhyrë në marrëdhënien e saj me djalin dhe ka përfshirë të miturin në konfliktin ligjor mes tyre. Ekipi i saj ligjor i ka cilësuar pretendimet e Martinez-it si të pabazuara dhe çorientuese.

Halle Berry dhe Olivier Martinez u martuan në vitin 2013 dhe u ndanë dy vjet më vonë. Divorci i tyre u finalizua në vitin 2023, kur ranë dakord për kujdestari të përbashkët të djalit.

Tashmë, aktorja kërkon që të rikthehet marrëveshja e mëparshme, ndërsa Martinez kërkon të marrë kujdestarinë e vetme.