Tirana lyen me bojë hidrofobike hapësirat që kthen urinën mbrapsht
Për të gjithë ata që ndotin hapësirat publike të kryeqytetit, Bashkia e Tiranës ka menduar që me ndihmën e kompanisë së bojërave, të lyejë pikat problematike me një bojë që kthen mbrapsht urinën. Lajmi është bërë i ditur nga kryetari i Bashkisë së Tiranës, Erion Veliaj, i cili në rrjetin social Facebook fton qytetarët që të shikojnë një video ku tregohet se cila është mënyra që është zgjedhur për t’iu përgjigjur ndotësve publike.Pas gjobave të vendosura për të gjithë urinuesit, Bashkia e Tiranës ka menduar të marrë edhe një tjetër masë kundër ndotësve të hapësirave publike. “Bashkia e Tiranës ka vendosur t’i përgjigjet ndotësve sipas mënyrës së saj. Është koha që qyteti të marrë hak.
“Me ndihmën e një kompanie që merret me bojërat, lyem të gjitha muret me një lloj boje superhidrofobike e cila bën të mundur kthimin mbrapsht të urinës, menjëherë sapo ajo prek sipërfaqen e lyer me bojë. Gjithashtu boja hidrofobike mbron monumentet e kulturës nga grafitet, vajrat e ndryshme, uji dhe balta”, thuhet në këtë video. Përmes këtyre pamjeve, kërkohet që t’u jepet mesazhi ndaj të gjithë urinuesve publik të Tiranës që të mbajmë pastër edhe qytetin.
