Tiranë, plagosi aksidentalisht me armë zjarri shokun e tij, vihet në pranga 19-vjeçari (EMRI)

Një incident është regjistruar gjatë orëve të natës në afërsi të Casa Italia-s, ku një 17-vjeçar mbeti i plagosur me armë zjarri dhe u transportua me urgjencë në spitalin e Traumës. Mësohet se gjendja e tij shëndetësore aktualisht është shumë e rëndë, pasi goditja ka qenë në pjesën e kokës.

Sipas hetimeve paraprake, dyshohet se plagosja ka ndodhur aksidentalisht gjatë momentit kur një 19-vjeçar po i tregonte armën shokut të tij, duke menduar se ajo nuk kishte fishek. Policia ka vënë në pranga autorin e dyshuar i identifikuar si Rigers Sylaj, si edhe dy persona të tjerë që ndodheshin në vendngjarje.

Njoftimi i plotë i policisë:

Rreth orës 01:40, pas njoftimit se në rrugën “Berit Beker” ishte plagosur me armë zjarri një 17-vjeçar, shërbimet e Sektorit për Hetimin e Krimeve të Rënda kanë shkuar menjëherë në vendngjarje, me qëllim sqarimin e rrethanave dhe dokumentimin e plotë ligjor të rastit.

Nga veprimet e para hetimore rezulton se në banesën e shtetasit R. S., 19 vjeç, ky i fundit, duke i treguar armën e zjarrit pistoletë shokut të tij dhe duke menduar se nuk kishte fishek në fole, e ka shkrepur aksidentalisht dhe për pasojë është plagosur 17-vjeçari.

Në përfundim të veprimeve të para hetimore:

-u bë arrestimi në flagrancë i shtetasit R. S., 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”;

-u arrestuan shtetasit A. V., 20 vjeç dhe H. H., 22 vjeç, për veprën penale “Veprime që pengojnë zbulimin e së vërtetës”.

17-vjeçari ndodhet në spital, nën kujdesin e mjekëve.

Vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes.

Materialet procedurale i kaluan Prokurorisë, për veprime të mëtejshme.