Tjetër disfatë politike për Kallas, i kundërshtohet nga disa shtete nisma për mbrojtjen evropiane

Shefja e politikës së jashtme të Bashkimit Evropian, Kaja Kallas, ka pësuar një tjetër goditje politike, pasi disa shtete anëtare kundërshtuan iniciativën e saj për krijimin e një grupi ekspertësh mbi mbrojtjen evropiane.

Shërbimi Evropian i Veprimit të Jashtëm (EEAS) anuloi në minutën e fundit, të dielën, krijimin e grupit të nivelit të lartë, i cili synonte të hartonte një raport mbi forcimin e kapaciteteve mbrojtëse të BE-së dhe identifikimin e boshllëqeve në investimet strategjike.

Kallas, Përfaqësuese e Lartë e BE-së për Punët e Jashtme dhe Politikën e Sigurisë, e kishte prezantuar nismën vetëm disa ditë më parë. Ajo kishte deklaruar se synimi ishte të mblidheshin ekspertë të shquar të sigurisë dhe mbrojtjes për të propozuar zgjidhje të reja për forcimin e mbrojtjes evropiane.

“Ne kemi vendosur të mos vazhdojmë me iniciativën”, tha një zyrtar i BE-së , duke kërkuar të mbetej anonim. Sipas tij, disa shtete anëtare vlerësuan se kjo “nuk ishte rruga e duhur për t’u ndjekur në këtë moment”.

Episodi i fundit nxjerr në pah vështirësitë politike me të cilat po përballet Kallas në përpjekjet për të avancuar nisma të reja pa një mbështetje të gjerë nga vendet anëtare.

Në një kohë kur EEAS-i po përballet me presion në rritje për reforma, mbështetja e shteteve anëtare, veçanërisht e vendeve më të vogla, mbetet thelbësore për rolin dhe ndikimin e shërbimit diplomatik të BE-së.