Tom Doshi rikthehet në Kuvend për herë të parë pas arrestimit

Për herë të parë pas arrestimit të tij nga policia para 4 muajsh, Tom Doshi është rikthyer në Kuvendin e Shqipërisë, pasi vazhdon të ketë mandatin e fituar në zgjedhjet e qershorit 2013.

Në seancën e sotme, ku pritet të diskutohen disa tema që janë në rend të ditës, Doshi është ulur në vendin e tij të zakonshëm pranë grupit të deputetëve të PS-së pa komunikuar thuajse me asnjë, përveç një komunikimi të shkurtër me socialistët Erion Braçe dhe Ervin Bushati.

Pasi ka qëndruar 20 minuta në seancën plenare, Doshi është larguar drejt kafes së Kuvendit.

Doshi aktualisht është nën masën e sigurisë “detyrim paraqitje”, pasi Gjykata e Lartë rrëzoi kërkesën e tij para pak javësh për të qenë i lirë.

Doshi u akuzua nga Prokuroria për akuzat tronditëse ndaj kryeparlamentarit Ilir Meta, me pretendimin se ky i fundit ka porositur persona të tjerë ta eliminojnë fizikisht së bashku me deputetin demokrat Mhill Fufi.