“Transaksioni”, arrestohet italiani për mashtrim kompjuterik

Policia e Tiranës ka vënë në pranga një shtetas italian, të dënuar në shtetin fqinj për mashtrim kompjuterik. Stefano Bottura, 43 vjeç, nga Firence është arrestuar pasi gjykata e Milanos e ka dënuar me 8 vite e 11 muaj burgim.

Në sajë të operacionit të koduar “Transaksioni”, bëhet e ditur se 3-6 tetor të këtij viti shtetasi italian ka kryer një transaksion nëpërmjet POS me vlerë rreth 1 miliardë lekë në banka të ndryshme në shtete të ndryshme.

Bashkë me italianin është shoqëruar edhe një 23-vjeçar nga Fieri, i cili ndodhej bashkë me Botturën. ndaj K. S., rëndon akuza e moskallëzimit të krimit dhe ai do të ndiqet penalisht në gjendje të lirë. Gjithashtu edhe ndaj shtetasit tjetër, D. P., 47 vjeç lindur e banues në Lugano, Zvicër, i dënuar më parë për trafik droge në Spanjë rëndon akuza e moskallëzimit të krimit.

Në cilësinë e provës materiale policia ka sekuestgruar një mjet tip fuoristradë, Mercedes Benz ML, një aparat POS, 1.850.000 lekë të reja, 60 karta të ndryshme bankare në pronësi të ndryshme, 8 telefona celularë dhe iPod dhe dy kompjutera portabël.

Gjithashtu janë sekuestruar bizhuteri të ndryshme floriri, dokumentacion të ndryshëm në lidhje me transaksionet e kryera, fatura, kontrata pune, deklarime tatimore etj. Hetimi vazhdon për dokumentimin e mëtejshëm të veprës penale dhe gjetjen e bashkëpunëtorëve të shtetasit italian.