Transportonin mallra kontrabandë nga Greqia, arrestohen 4 persona në Korçë

Katër persona në Korçë janë arrestuar në Korçë pasi dyshohen të kenë transportuar mallra kontrabandë nga Greqia në Shqipëri.

Prokuroria e Korçës njofton se shtetasit me iniciale V.N. dhe A.N., në bashkëpunim me njëri-tjetrin dhe persona të tjerë, kishin ngritur një aktivitet të qëndrueshëm kriminal për futjen e konfeksioneve në mënyrë të paligjshme në territorin shqiptar. Ata udhëtonin drejt shtetit grek me automjete të përshtatura posaçërisht për këtë veprimtari, të cilave u ishin hequr sediljet e pasme për të rritur kapacitetin transportues dhe për të shmangur dyshimet gjatë lëvizjeve.

Mallrat siguroheshin në Greqi dhe liheshin pranë vijës kufitare, ndërsa më pas transportoheshin në mënyrë të paligjshme përmes kufirit të gjelbër nga bashkëpunëtorë të tjerë. Në disa raste, mallrat merreshin nga vetë organizatorët në zonat kufitare, ndërsa në raste të tjera transportoheshin me mjete drejt qytetit të Korçës, ku magazinoheshin dhe më pas hidhej në treg përmes subjektit tregtar të administruar nga shtetasit A.N. dhe V.N.

Kështu, shtetasit V.N., A.N., A.L. dhe S.N, u arrestuan teksa po shkarkonin mallra të dyshuara kontrabandë në një ambient magazinimi në qytetin e Korçës.

Si provë materiale, u sekuestruan 15 thasë me konfeksione, me një total prej 1632 copë veshjesh, si dhe në ambientet e magazinës janë gjetur edhe 73 thasë të tjerë dhe mallra rifuxho me peshë totale 1357 kg. Po ashtu u sekuestruan automjete të përdorura për transportin e mallrave, përfshirë mjete të modifikuara pa sedilje, si dhe aparate celularë dhe dokumentacion i ndryshëm që lidhet me aktivitetin kriminal.

/tvklan.al