Trazira brenda kampit të Senegalit para ndeshjes me Irakun

Senegali po paraqitet në Kupën e Botës për herë të katërt, por situata e skuadrës është e vështirë pas dy ndeshjeve të para: ekipi ende nuk ka fituar pikë dhe rrezikon eliminimin që në fazën e grupeve, duke qenë se duhet të mundë Irakun të premten për të mbajtur gjallë shpresat për kualifikim.

Sipas bbc, fillimi i kampionatit është errësuar nga një sërë problemi brenda kampit, përfshirë mosmarrëveshje për bonuse dhe pagesa, ndryshim të fundit të kuzhinierit dhe ankesa për ushqimin, si dhe debate rreth kontratës së trajnerit Pape Thiaw që kanë ngjallur shqetësime se çështjet jashtëfushore mund të ndikojnë në performancën në fushë.

Skuadra qëndron në hotelin katër yje Hyatt Regency në New Brunswick, New Jersey, ndryshe nga hoteli pesë yjesh Fairmont Palace në Tangier, ku u akomodua gjatë Kupës së Kombeve të Afrikës 2025 në Marok. Megjithatë, vendndodhja e hotelit pranë bazës stërvitore në Rutgers University e bën këtë zgjedhje të pranueshme për stafin teknik.

Ekipi kishte udhëtuar me kuzhinierin e tij, i cili ka qenë prezent në turne të mëparshëm dhe përgatit menu muaj përpara grumbullimeve. Ai qëndroi me ekipin deri pas ndeshjes së dytë miqësore para Botërorit — përballjet përgatitore kundër SHBA në Charlotte dhe Arabisë Saudite në San Antonio — dhe u largua për arsye personale. Ku zhiniere u zëvendësua dhe lojtarët nuk kanë shprehur probleme me shërbimin e ushqimit.

Shumica e ankesave kanë ardhur nga anëtarë të tjerë të delegacionit, jo nga lojtarët apo stafi teknik. Disa nga këta persona, të pakënaqur që ushqimi senegalez nuk po ofrohej siç pritej, kanë dalë jashtë për të porositur vakte të tjera. Gjithashtu është raportuar se disa zyrtarë të Federatës së Futbollit të Senegalit kanë sjellë familjarë që kanë paguar vetë udhëtimin dhe kanë qëndruar afër hotelit zyrtar, çka herë pas here ka krijuar pakënaqësi për shkak të pranisë së tyre afër skuadrës.

Familjarët e lojtarëve janë akomoduar në një hotel tjetër pranë dhe federata ka paguar strehimin dhe mëngjesin e tyre. Përtej shqetësimeve për ushqimin dhe strehimin, mbetet edhe çështja e bonuseve të papaguara dhe debati mbi kontratën e trajnerit, çka mund të ndikojë në moralin e ekipit dhe në përgatitjen për ndeshjen vendimtare — raporton bbc.