Vuçiçi fali edhe shoferin që goditi me makinë 90-vjeçarin para Fakultetit Juridik në Beograd

Ish-presidenti i Serbisë, Aleksandar Vuçiç, ka falur edhe Miodrag Selakoviqin, shoferin i cili më 14 maj kishte çarë me makinë bllokadën pranë Fakultetit Juridik në Beograd, gjatë homazheve për viktimat e shembjes së strehës së betonit në stacionin hekurudhor të Novi Sadit, duke rrëzuar 90-vjeçarin Veroljub Sariq, raporton N1.

Lajmin e ka konfirmuar Gjykata Themelore e Beogradit, e cila njoftoi se më 2 nëntor i është dorëzuar elektronikisht, përmes Ministrisë së Drejtësisë, vendimi i faljes i Vuçiçit, i datës 27 shtator. Sipas njoftimit të gjykatës, me këtë vendim Selakoviqi lirohet nga ndjekja penale për veprë të rëndë kundër sigurisë publike, në çështjen që zhvillohej para Gjykatës së Parë Themelore të Beogradit, pas propozimit të aktakuzës nga Prokuroria e Lartë Publike e Beogradit.

Procedura e faljes, siç njofton gjykata, ishte nisur sipas detyrës zyrtare nga ministri i Drejtësisë. Vendimi i presidentit për falje hyn në fuqi ditën e marrjes së tij, ndërsa gjykata theksoi se në çështjen përkatëse do të veprojë më tej në përputhje me ligjin.

Emri i Selakoviqit bëhet publik ndërsa gjykatat serbe po nxjerrin emrat e personave të falur nga Vuçiçi përpara dorëheqjes së tij si president; ndër emrat e zbuluar më herët janë edhe ish-zyrtarja e lartë e policisë Dijana Hrkaloviq dhe 18 persona në Novi Sad, për të cilët 24-ore.com ka raportuar më 2 nëntor.