Sulmi me vezë i protestuesve ndaj Ramës, Balla: Emrat e tyre lidhen me histori shtëpi bari

Kreu i grupit parlamentar të PS, Taulant Balla, ka reaguar nga Nju Jorku për protestuesit që i hodhën vezë kryeministrit Edi Rama, duke postuar një fragment nga videoja kur ata neutralizohen nga efektivët amerikanë.

Balla shkruan se bëhet fjalë për të njëjtët persona që i kanë ndjekur kudo dhe kanë punuar në shtëpi bari.

Sipas kreut të grupit socialist, ata thjesht u shërbejnë atyre nga të cilët paguhen.

Reagimi i Ballës:

“Këto tre katër sorra që shfaqen kudo të njëjtët, njëri prej tyre një M.M., i njëjti edhe para dy vitesh në New York, edhe në Londër, pastaj në Bulevard me ditë të tëra, janë persona me emra të ndryshuar dhe histori shtëpish bari. Nuk kanë asnjë lidhje me shqiptarët e Amerikës, janë paguar për turpin e tyre për të ardhur këtu. Ndërsa Kryeministri Rama mbron në New York çlirimtarët dhe flet për Shqipërinë Europiane, këta i bëjnë hyzmetin atyre që i paguajnë. E thjeshtë prej kujt i marrin urdhrat.

P.s. Shikojeni dhe reagimin e policisë amerikane, meqë kritikoni Policinë e Shtetit”.