Trump pezullon përkohësisht operacionin në Ngushticën e Hormuzit, pret marrëveshje me Iranin

Presidenti amerikan, Donald Trump, ka njoftuar pezullimin e përkohshëm të operacionit “Projekti Liri”, që synonte shoqërimin e anijeve në Ngushticën e Hormuzit, duke theksuar se vendimi erdhi edhe pas kërkesës së Pakistanit dhe vendeve të tjera ndërmjetësuese.

Sipas tij, operacioni do të qëndrojë i pezulluar përkohësisht për t’i hapur rrugë negociatave, ndërsa bllokada ndaj porteve iraniane do të vazhdojë.

“Bazuar në kërkesën e Pakistanit dhe vendeve të tjera, bazuar në suksesin e jashtëzakonshëm ushtarak që kemi pasur gjatë fushatës kundër Iranit dhe, përveç kësaj, faktin se është bërë një përparim i madh drejt një marrëveshjeje të plotë dhe përfundimtare me përfaqësuesit e Iranit, ne kemi rënë dakord reciprokisht që, ndërsa bllokada do të mbetet në fuqi dhe efekt të plotë, Projekti Liri (lëvizja e anijeve përmes Ngushticës së Hormuzit) do të ndalet për një periudhë të shkurtër kohore për të parë nëse marrëveshja mund të finalizohet dhe nënshkruhet apo jo”, thotë Trump.

Ndërkohë, sekretari amerikan i Shtetit, Marco Rubio, deklaroi nga Shtëpia e Bardhë se ofensiva fillestare SHBA-Izrael ndaj Iranit, operacioni “Epic Fury”, ka përfunduar pasi ka arritur objektivat e saj, duke shtuar se Uashingtoni preferon një zgjidhje diplomatike.

Zhvillimet vijnë në një klimë të tensionuar në rajon, ku incidentet në Ngushticën e Hormuzit kanë shtuar pasigurinë për transportin global të energjisë dhe tregtinë ndërkombëtare.