Trump: SHBA duhet të ketë normën më të ulët të interesit në botë, disa ditë para takimit të Fed-it

Presidenti i Shteteve të Bashkuara, Donald Trump, deklaroi të dielën se asnjë vend në botë nuk duhet të ketë norma interesi më të ulëta se SHBA – vetëm disa ditë para takimit vendimtar të Rezervës Federale mbi politikën monetare.

Duke folur me gazetarët gjatë turneut të golfit “Irish Open”, Trump u shpreh se Shtetet e Bashkuara “duhet të paguajnë normën më të ulët të interesit në botë”, pavarësisht nga të dhënat e Rezervës Federale për inflacionin dhe gjendjen e ekonomisë.

Komentet e tij vijnë pak ditë para takimit të politikës monetare të Fed-it, të caktuar për më 16 shtator. Para më pak se një jave, Departamenti i Punës publikoi Indeksin e Çmimeve të Konsumit, i cili shënoi rritjen më të madhe të katër muajve të fundit – një zhvillim që ka përforcuar pritshmëritë se banka qendrore mund të rrisë normat e interesit.

Takimi i Fed-it zhvillohet vetëm disa javë para zgjedhjeve të mesit të mandatit, të cilat do të vendosin nëse republikanët do të ruajnë shumicat e tyre të ngushta në të dyja dhomat e Kongresit. Sipas sondazheve Reuters/Ipsos, një rritje e mundshme e normave mund të thellojë shqetësimet e votuesve për koston e jetesës.

Vlerësimet e miratimit të Trump kanë pësuar rënie ndërsa inflacioni ka vijuar. Ai argumentoi se normat e interesit të Fed-it kanë ndihmuar vendet e tjera në dëm të SHBA-së: “Unë di më shumë për formulat se kushdo tjetër, dhe me kredinë më të mirë në botë, ne i bëjmë vendet e tjera të pasura”, tha ai.

Trump ka qenë një kritik i shpeshtë i ish-kryetarit të Fed-it, Jay Powell, dhe është treguar më mbështetës që kur i zgjedhuri i tij, Kevin Warsh, mori drejtimin në fillim të këtij viti – por kërkesat e tij janë bërë gjithnjë e më të hapura: dy javë më parë ai postoi në rrjetet sociale: “ULI NORMËN OSE DO TË NDALOJ TREGTINË ME VENDET ME TË CILAT KEMI DEFICIT”.

Drejtori i Këshillit Kombëtar Ekonomik, Kevin Hassett, i tha emisionit “Fox News Sunday” se Trump “do të mbrojë pavarësinë e Kevin Warsh mbi gjithçka tjetër”, pavarësisht nga vendimi i Fed-it, duke shtuar: “nëse është një rritje e normës… jam i sigurt se nuk do të jetë shumë i kënaqur për këtë”.

Burimi: Reuters