Trump thotë se nuk hetoi Bidenin dhe Obamën nga respekti për presidencën

Presidenti amerikan Donald Trump deklaroi më 7 tetor se paraardhësit e tij demokratë në Shtëpinë e Bardhë, Joe Biden dhe Barack Obama, “kanë bërë gjëra shumë të këqija”, por se ai vetë zgjodhi të mos i hetojë, nga respekti për institucionin e presidencës, siç njofton USA Today.

Deklaratat u bënë në Zyrën Ovale, si përgjigje ndaj pyetjes së gazetarëve nëse pret të impeach-ohet për herë të tretë, nëse demokratët do të fitojnë kontrollin e Kongresit në zgjedhjet e mesmandatit të 3 nëntorit. Trump u shpreh se shumë njerëz i kanë kërkuar ta bëjë një hetim ndaj Bidenit, Hillary Clintonit dhe Obamës, por se përgjigjja e tij ishte se presidencën “s’mund ta trajtosh me mosrespekt”.

Por, siç vë në dukje USA Today, Departamenti i Drejtësisë i administratës së tij ka paditur disa prej kritikëve më të zëshëm të presidentit: ish-drejtorin e FBI-së James Comey dhe prokuroren e përgjithshme të Nju Jorkut, Letitia James. Gjykatësit i hodhën poshtë akuzat, por Comey u padit për herë të dytë, ndërsa janë kërkuar akuza edhe ndaj senatorit Adam Schiff dhe është hapur një hetim ndaj ish-kryetarit të Rezervës Federale, Jerome Powell, lidhur me rinovimin e ndërtesës së Fed-it.

Dhoma e Përfaqësuesve e ka impeach-uar Trumpin dy herë gjatë mandatit të tij të parë — për marrëdhëniet me Ukrainën dhe për sulmin e 6 janarit 2021 ndaj Kapitolit — por Senati e shpalli të pafajshëm në të dy rastet. I pyetur sërish për mundësinë e një impeachment-i të tretë, Trump tha se ai “fitoi bindshëm” dhe se nuk është shqetësuar kurrë për këtë.