Turqia paralajmëron Ministrin grek Kammenos: Mblidh mendtë e kokës!
Ministri turk i Punëve të Jashtme i është drejtuar me një retorike të ashpër Ministrit grek të Mbrojtjes, teksa tensionet mes dy shteteve fqinje lidhur me dy ishuj të vegjël e të pabanuar në Egje vazhdojnë të mbeten lart.
“Ministri (Grek) i Mbrojtjes të mbledhë mendtë e kokës!,” tha Mevlut Cavusoglu duke iu drejtuar ministrit Panos Kammenos.
“Ky ministër vazhdimisht kryen provokime”, tha Cavusoglu, i cituar nga “Hurriyet”. “E kam fjalën për partnerin në qeverisje të Ciprasit, i cili është në të njëjtën kohë edhe Ministër i Mbrojtjes i Greqisë.”
Ministri turk tha se Kammenos prej kohësh bën provokime ndaj Turqisë. “Shumicën e këtyre nuk i vendosim fare në agjendë. Mirëpo, Greqia po precipiton situatën duke përfituar nga çështja e Karadakut. Ministri i Mbrojtjes të mbledhë mendtë e kokës!”
“Greqia nuk duhet të përfitojë nga sjellja jonë e mirë. Ne dimë të japim edhe përgjigjen që meritojnë. Sjellja e këtij ministri nuk është e re. Këto sjellje i’a kemi bërë të ditur edhe Ciprasit,” tha Cavusoglu.
“Dy shtetet duhet t’i zgjidhin çështjet e diskutueshme duke biseduar, duhet të jemi të matur. Në rast se gjendja precipiton, mos e thëntë Zoti, nëse ndodh ndonjë incident i padëshiruar, nuk ka kthim pas. Ne po veprojmë me një pjekuri të madhe. Edhe ministri grek duhet të veprojë me pjekuri”, shtoi ai.
Komentet e Cavusoglusë vijnë pasi Ministri Grek i Mbrojtjes, Panos Kammenos, fluturoi mbi zonën e diskutuar mes dy vendeve ditën e Mërkurë dhe hodhi disa kurora me lule nga helikopteri në det, në vendin ku në vitin 1996 u vranë tre ushtarë grekë.
Ndërkohë, Kreu i Forcave të Armatosura turke Hulusi Akar po ashtu vizitoi ishujt me 29 Janar, lëvizje që u dënua nga Athina zyrtare.
Luftanijet e dy vendeve janë vënë disa herë ballë për ballë në afërsi të ishujve të kontestuar dhe situata vazhdon të jetë e tensionuar.
Në 1996-ën Turqia dhe Greqia u përplasën në atë që njihet si Kriza e Karadakut. Të dy shtetet zbarkuan ushtarë në dy ishujt e pabanuar dhe për pak u shmang një përplasje frontale mes dy ushtrive.
Dy ishujt e vegjël shkëmborë të Imias apo Karadakut ndodhen në Detin Egje mes vargut të ishujve grekë Dodecanese dhe brigjeve jugperëndimore të territorit turk.
