TVSH-ja për ujin dhe produktet higjienike ulet në 6%, Komisioni i Ekonomisë miraton ndryshimet edhe me votat e opozitës
Komisioni i Ekonomisë miratoi futjen e ujit dhe të produkteve higjienike për gratë e fëmijët në skemën e TVSH-së së reduktuar 6%, nga 20% që është sot. Projektligji pritet të kalojë në seancën plenare të 26 nëntorit.
Uji dhe produktet e higjienës personale për gratë dhe fëmijët, përfshirë pecetat dhe pelenat, do të tatohen me TVSH të reduktuar 6%, në vend të 20% që zbatohet sot. Siç njofton Shqiptarja.com, Komisioni i Ekonomisë miratoi të premten amendamentet e propozuara nga deputetët, duke i futur këto produkte në skemën e TVSH-së së reduktuar për produktet bazë.
Një nga propozimet u bë nga deputetja e Partisë Socialiste, Evis Kushi, ndërsa deputeti Enno Bozdo propozoi që uji të përfshihet në skemën e TVSH-së së reduktuar, duke argumentuar se në shumicën e vendeve të Bashkimit Europian uji tatohet me TVSH të ulët. Edhe deputeti Çakërri kërkoi përfshirjen e ujit në skemën e reduktuar, si një produkt jetik për qytetarët.
Gjatë diskutimeve, deputetja Kushi tha se kostoja e uljes së TVSH-së për produktet e higjienës menstruale është rreth 220 milionë lekë. Ministria e Financave i kundërshtoi propozimet, duke argumentuar se ulja e TVSH-së për produktet bazë nuk është shoqëruar me rënie të çmimeve në treg.
Me propozim të deputetit Kadeli, komisioni miratoi edhe uljen nga 20% në 6% të TVSH-së për projektimin e ndërtimeve të dedikuara sportit.
Projektligji u miratua me 10 vota pro, përfshirë edhe ato të deputetëve të opozitës Edmond Haxhinasto dhe Enno Bozdo, dhe pritet të kalojë për shqyrtim në seancën plenare të 26 nëntorit.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.