Udhëtim rreth botës me energji diellore, niset Solar Impulse, avioni i parë pa karburant

Ti biesh botës qark me një avion që furnizohet me energji diellore. Është ky misioni i pilotëve zviceranë Bertrand Piccard dhe Andre Borschberg, të cilët të hënën inauguruan Solar Impulse 2, me udhëtimin e parë nga Abu Dhabi në Muscat, kryeqyteti i Oman.

Pesë muaj udhëtim dhe 21 750 milje të përshkuara në pesë kontinente dhe dy oqeane, pa konsumuar asnjë pikë karburant.

Solar Impulse 2, peshon më pak se dy tonë dhe ka një hapje prej 71 metrash në krahët e tij, të cilat mbulohen nga 17 000 qeliza diellore, të cilat e bëjnë mjetin e parë fluturues të ushqyer me energji diellore dhe që është në gjendje që të fluturojë edhe ditën edhe natën.

“Kam besim se është një avion vërtetë i veçantë dhe duhet të jetë i tillë për të na çuar përtej oqeaneve”, tha Borschberg për BBC. Pilotët i janë nënshtruar një përgatitje strikte në mënyrë që të mjaftohen vetëm me 20 minuta gjumë gjatë fluturimit, duke u stërvitur me joga etj.

Në disa raste Solar Impulse 2, do të fluturojë për pesë ditë me radhë pa u ndalur.

Përmes kanalit të Youtube të cilin e shihni në videon më poshtë, të Solar Impulse, të interesuarit do të përditësohen lidhur me misionin e Piccard dhe Borschberg.