UGANDË – Të paktën 20 nxënës humbin jetën në një aksident tragjik me autobus

KAMPALA, 17 korrik /ATSH-DPA/- Të paktën 20 nxënës dhe një i rritur humbën jetën në një aksident të rëndë me autobus në Ugandën lindore, një nga incidentet rrugore më të rënda në vend në vitet e fundit, njoftoi sot policia.

Sipas policisë, nxënësit po ktheheshin dje në mbrëmje nga një ekskursion në Ujëvarat Sipi, në rajonin e Malit Elgon, kur autobusi me të cilin udhëtonin doli nga rruga dhe u përmbys.

“Drejtuesi i mjetit humbi kontrollin e autobusit, i cili u përplas me një shkëmb të madh në anë të rrugës dhe më pas u rrokullis”, deklaroi policia.

Kryqi i Kuq i Ugandës publikoi fotografi nga vendngjarja, ku shihen trupat e përgjakur të fëmijëve në rrugë.

Media vendase publikoi gjithashtu pamje të autobusit të shkatërruar, të përmbysur dhe pa çati.

Në rrjetet sociale kanë qarkulluar pretendime se autobusi ishte në gjendje të keqe teknike, por autoritetet nuk i kanë konfirmuar zyrtarisht këto raportime. /