Ukraina akuzon zyrtarë të lartë të sigurisë dhe policisë për rrjet kriminal

Tre zyrtarë të lartë nga policia dhe shërbimi i sigurisë së Ukrainës janë akuzuar për përfshirje në një rrjet kriminal të përfshirë në mashtrim, shitje droge dhe prodhim të monedhës dhe cigareve të falsifikuara. Kështu njoftuan të enjten autoritetet antikorrupsion.

Byroja Kombëtare Kundër Korrupsionit e Ukrainës, ose NABU, publikoi të mërkurën detaje të asaj që e quajti një hetim të gjerë mbi një rrjet që vepronte me ndihmën dhe mbrojtjen e zyrtarëve të lartë të sigurisë dhe të zbatimit të ligjit.

Në një deklaratë tjetër të enjten, ajo tha se kishte dërguar njoftime dyshimi për një zëvendësdrejtor të parë të departamentit në shërbimin e sigurisë së brendshme të SBU-së, një drejtues departamenti dhe një zëvendësshefi seksioni në Policinë Kombëtare.

Dy organizatorë të tjerë të dyshuar u informuan gjithashtu për akuzat. Asnjë nga të dyshuarit nuk u emërua. Agjencia tha se ishte në proces të hartimit të akuzave kundër anëtarëve të tjerë të organizatës, ku përfshiheshin të paktën 7 persona të tjerë.

Hetimi me emrin e koduar “Kartagjena”, është i fundit që synon zyrtarë të lartë ukrainas, ndërsa vendi kërkon të zhdukë korrupsionin si pjesë e ambicieve të tij për t’u bashkuar me Bashkimin Evropian.

Në një deklaratë të enjten, shefi i stafit të presidentit Volodymyr Zelenskyy tha se situata kërkonte “veprime të forta dhe në kohë”.

“Ligji është i njëjtë për të gjithë”, shkroi Kyrylo Budanov në rrjetet sociale.

“Pozicionet, titujt dhe pushtetet nuk mund të jenë bazë për të shmangur përgjegjësinë”, shtoi ai.