Ukraina dërgon sërish ushqime dhe ilaçe me dronë në Oleshkyn e okupuar: gati 4 tonë në pothuajse 400 pako

Ukraina ka kryer një operacion të dytë të madh për dërgimin e ushqimeve dhe ilaçeve me dronë në qytetin e Oleshkyt në jug, të okupuar nga Rusia, njoftoi të dielën (4 tetor) ministri i Jashtëm ukrainas Andrii Sybiha. Dërgesa e re përbëhej nga gati 400 pako të specializuara me pothuajse katër tonë ushqime dhe ilaçe, të shpërndara me dronë mbi qytet.

Operacionin e kryen efektivë të Gardës Kombëtare ukrainase së bashku me njësi të tjera mbrojtëse, bëri të ditur Ministria e Punëve të Brendshme, siç njofton Reuters. Ministri i Brendshëm Ivan Vyhivskyi falënderoi të gjithë pjesëmarrësit në këtë aksion humanitar, ndërsa vlerësim të veçantë mori ekuipazhi i dronit “Perun”, i cili gjatë operacionit shpëtoi edhe gjashtë kafshë nga territori i okupuar.

“Prej muajsh, Rusia po përpiqet të izolojë ukrainasit në Oleshky nga bota e jashtme, duke penguar edhe dërgimin e ushqimit për njerëzit që përballen me mungesa të rënda,” shkroi Sybiha në platformën X, në deklaratën që citohet nga Reuters.

Oleshky është qytet në vijën e frontit përgjatë lumit Dnipro, i okupuar nga Rusia që nga viti 2022. Në qytet kanë mbetur rreth 2,000 banorë, mes tyre rreth 50 fëmijë, të cilët prej muajsh vuajnë mungesën e ushqimit dhe ilaçeve. Ombudsmani ukrainas për të drejtat e njeriut, Dmytro Lubinets, ka deklaruar se pala ruse nuk ka pranuar propozimet e Kievit për evakuimin e civilëve.

Vetë Kremlini ka pranuar se Oleshky ka “probleme kritike” me furnizimin, por pretendon se ushtria ruse po punon për t’i zgjidhur. Operacioni i së dielës vjen vetëm pak ditë pas dërgesës së parë të ngjashme në fund të shtatorit, kur dronët ukrainas shpërndanë një ngarkesë të parë me ndihma mbi qytetin e izoluar.