“Ukrainasit nuk e zgjodhën këtë luftë. Ne zgjedhim të mos vdesim”, Zelenski i flet Asamblesë së Përgjithshme të OKB-së

Presidenti ukrainas Volodymyr Zelenski iu drejtua të mërkurën Asamblesë së Përgjithshme të Kombeve të Bashkuara, ku bëri thirrje për mbështetje të vazhdueshme për Ukrainën, theksoi rëndësinë e negociatave dhe paralajmëroi se ukrainasit do të vazhdojnë të rezistojnë kundër Rusisë.

“Po, ndonjëherë mund të duket se Ukraina është e fokusuar vetëm te lufta, sepse flasim për armë, për mbrojtje dhe për sanksione kundër agresorit. Por ukrainasit nuk e zgjodhën këtë luftë. Ne zgjedhim të mos vdesim, të mos humbasim vendin, familjet tona, të mos humbasim pavarësinë, lirinë tonë,” tha Zelenski në fjalimin e tij.

Ai tha se deficiti buxhetor i Rusisë është më i madh se në çdo vit tjetër dhe se shumica e rajoneve ruse janë në falimentim, ndërsa shtoi se të gjitha operacionet kryesore ruse në front gjatë kësaj vere dështuan.

“Asnjë zyrtar rus nuk e imagjinoi kurrë se ‘Gjenerali Dimër’, që kishte luftuar në krah të Rusisë për shekuj, një ditë do të ndërronte anë dhe do të mbështeste ata që mbrohen nga Rusia. Ne do ta bëjmë këtë të ndodhë këtë dimër, nëse Rusia vazhdon të godasë sistemin tonë energjetik dhe ngrohjen,” tha ai.

Sipas Zelenskit, Rusia kurrë nuk e priste që Ukraina të mund të godiste fabrikat ushtarake në Siberi, thellë brenda territorit rus. Ai paralajmëroi se vitin tjetër “është e mundur që inteligjenca artificiale, jo vetëm njerëzit, të fillojë të vendosë për atë që ndodh në fushën e betejës”, ndaj paqja nevojitet përpara se të arrihet ajo pikë.

Ai e quajti presidentin rus Vladimir Putin “pacienti zero” që nisi luftën e Rusisë dhe tha se “sa më gjatë të jetë në gjendje Putin të zhvillojë luftë, aq më shumë të keqe do të lërë pas në këtë botë”. Ai shtoi se dimri mund të jetë shumë i ashpër për ukrainasit, “por në përgjigje nuk do të kemi zgjidhje tjetër veçse ta bëjmë të dhimbshëm edhe për Rusinë”.

Zelenski tha gjithashtu se Rusia po rekruton qytetarë të 47 vendeve të ndryshme në luftën e saj dhe u bëri thirrje përfaqësuesve të çdo kombi të mos lejojnë që qytetarët e tyre “të përfundojnë në një front tjetër” dhe të tërhiqen në luftën e Rusisë.

Burimi: The Kyiv Independent