UKRAINË – Umerov emërohet kreu i shërbimit të inteligjencës së jashtme

KIEV, 3 gusht /ATSH-DPA/- Presidenti ukrainas Volodymyr Zelensky ka emëruar kryenegociatorin Rustem Umerov në postin e kreut të ri të shërbimit të inteligjencës së jashtme të Ukrainës.

“Umerov, i cili më herët ka mbajtur edhe postin e ministrit të Mbrojtjes, do të vazhdojë të jetë përgjegjës edhe për negociatat me Rusinë, të zhvilluara së fundmi nën ndërmjetësimin e SHBA-së”, njoftoi sot Zelensky.

“Umerov, i cili deri tani ishte sekretar i Këshillit të Sigurisë Kombëtare të Ukrainës, do të koordinojë gjithashtu eksportin e dronëve ukrainas dhe integrimin e tyre në sistemet e mbrojtjes të vendeve të tjera”, tha Zelensky gjatë një takimi me diplomatët.

Sipas raportimeve, Ukraina ka tashmë kontrata me nëntë vende për këtë fushë, ndërsa priten marrëveshje të tjera.

Posti i kreut të inteligjencës së jashtme është mbajtur për disa muaj nga një drejtues në detyrë.

Pas riorganizimit qeveritar, i cili u shoqërua me protesta në Ukrainë, Zelensky emëroi ish-ministrin e Brendshëm, Ihor Klymenko si sekretar të ri të Këshillit të Sigurisë Kombëtare.

Klymenko ishte përmendur më herët si një kandidat i mundshëm për të zëvendësuar ministrin e njohur të Mbrojtjes, Mykhailo Fedorov, shkarkimi i të cilit shkaktoi protesta në Kiev.

Protestat kundër ndryshimeve të diskutueshme në emërimet e zyrtarëve nga presidenti Zelensky, kanë vijuar prej disa javësh në Ukrainë.

Zelensky synon të emërojë Yevhen Khmara – kreun në detyrë të shërbimit të sigurisë SBU – si ministrin e ri të Mbrojtjes.

Për të hyrë në fuqi, emërimi duhet ende t’i paraqitet parlamentit dhe të miratohet prej tij. /