Vazhdon protesta kundër reformës së arsimit të lartë

Studentët e Universitetit publik kanë nisur protestën kundër ligjit për arsimin e lartë, por edhe dhunës shumëpërmasore siç e quajnë ata. Organizatorët kërkojnë nga qeveria dhe mazhoranca që të tërheqin këtë ligj, që sipas tyre shkatërron arsimin e lartë dhe çon fondet publike drejt institucioneve private arsimore.

Në një postim në rrjetin social “Facebook”, Lëvizja për Universitet bën thirrje që ti bashkohen të gjithë studentët kësaj proteste.

Studentët e kanë nisur protestën nga korpusi drejt Kryeministrisë. Në protestë janë të pranishëm edhe pedagogë e studentë të tjerë, ndërsa vihet re një numër i madh forcash policie që janë vendosur si gardh pranë Kryeministrisë.

“Për Universitetin për Shqipërinë” është një nga pankartat që studentët mbajnë në duar. Mësohet se protestës i janë bashkuar edhe studentë nga rrethet.

Studentët shprehen se “kjo protestë do të jetë paqësore dhe që do të parashtrojnë kërkesat e tyre”.

Një studente u shpreh: “Jemi mbledhur për të kundërshtuar dhunën e gjithanshme ndaj studentëve, duke nisur nga rritja e taksave e deri tek dhuna ndaj studentëve që u bë në komisariatet e Tiranës. Kemi përdorur të gjitha mjetet paqësore kundër reformës së arsimit të lartë, por kurrë nuk u morën në konsideratë. Sot, jemi këtu kundër dhunës rrënuese së kësaj reforme. Ne kërkojmë tërheqjen e kësaj reforme para se të jetë vonë. I bëjmë thirrje studentëve, pedagogëve dhe shoqërisë që të na bashkohen në këtë protestë. Ne nuk i trembemi asgjëje, rezistenca vazhdon” .

Dardan nga Kosova, i cili u arrestuar ditën kur u qëllua me vezë ndaj kryeministrit Rama tha: “Kemi ardhur këtu për të shprehur solidaritetin tonë. Ju keni qenë frymëzim për ne, prandaj do të jemi bashkë me ju. Bashkë do të jemi më të fortë”.

Protestës i janë bashkuar edhe gjimnazistë nga rrethe të ndryshme. Një gjimnaziste nga Durrësi tha: “Nga ky ligj neve na mbetet vetëm të ëndërrojmë universitetin. Të gjithë kemi parë dhunën ndaj studentëve, unë jam kundër kësaj dhune”.