Veliaj mbetet në burg, merr ‘Jo’ edhe nga Gjykata e Lartë

28 maj 2026 – Pavarësisht kërkesave të vazhdueshme për të fituar lirinë, vjen një tjetër ‘refuzim’ për kryebashkiakun e Tiranës, Erion Veliaj. Pasi shqyrtoi kërkesën e tij për zëvendësim të masës së sigurisë, që prej orës 13:00, Gjykata e Lartë vendosi të lërë në fuqi vendimin e Apelit të Posaçëm për kreu e bashkisë më të madhe në vend.

Ai do vijojë të mbetet në qeli, ndërsa pritet njoftimi zyrtar i arsyetuar nga ana e togave të zeza.

Kujtojmë se tre ditë më parë, Gjykata Kushtetuese e pranoi pjesërisht kërkesën e Veliajt, duke i kërkuar sqarim Gjykatës së Lartë se pse “arresti me burg” është proporcional.

Megjithatë, siç raportoi gazetarja e Klan News, Glidona Daci, ajo që u trajtua sot nuk ka lidhje (në aspektin procedurial) me këtë çështjen e kthyer më herët nga Kushtetuesja.

“Masa e parë lidhet me caktimin e masës së sigurimit, ndërsa ajo e sotmja është për zëvendësimin e masës”, sqaroi Daci.

Veliaj ndodhet në burg që prej 10 shkurtit të vitit 2025. Prokuroria e Posaçme ka ngritur një sërë akuzash ndaj tij, duke përfshirë korrupsion pasiv në disa raste, pastrim parash, mosdeklarim të pasurisë, shpërdorim detyre dhe futje të sendeve të ndaluara në burg.

Sipas SPAK, shumica e akuzave lidhen me marrje të përfitimeve të paligjshme në 9 raste, ku kompanitë e përfshira kanë përfituar leje ndërtimi dhe fonde publike nga Bashkia Tiranë, në këmbim të favoreve monetare dhe pasurive të paluajtshme.