Vendimi, anijet do të paguajnë tarifë ekologjike

Çdo anije që ankorohet në portet shqiptare do të paguajë, duke sjellë shmangien e shkarkimit të mbetjeve dhe ndotjes së detit.
Vendimi u miratua nga Këshilli i Ministrave dhe përackton rregulloren “Për miratimin e kërkesave për parandalimin e shkarkimit të mbetjeve të krijuara nga anijet dhe tepricat nga ngarkesat në det”, si propozim i Ministrisë së Mjedisit.

Qëllimi kryesor është mbrojtja e mjedisit detar, përmes reduktimit të shkarkimit në det të mbetjeve të krijuara nga anijet dhe të tepricave nga ngarkesat e tyre, gjatë përdorimit të porteve të Republikës së Shqipërisë.

– Sipas këtij vendimi çdo anije që ankorohet në një port shqiptar, përpara largimit nga porti, i dorëzon të gjitha mbetjet e krijuara nga anija, referuar rregullores që kjo VKM parashikon. Ministria e Transportit, sipas parashikimit në propozimin e Ministrisë së Mjedisit në këtë akt, pas konsultimit me këtë të fundit do të sigurojë që kostot e instalimeve marrëse portuale për mbetjet e krijuara nga anijet, përfshirë trajtimin dhe largimin e tyre, të mbulohen përmes mbledhjes së tarifës ekologjike të detyruar për anijet dhe mjetet lundruese për mbetjet.
– Operatorët e liçensuar që do të kontraktohen nga Drejtoria e Përgjithshme Detare, duhet të zotërojnë kapacitetet e nevojshme për të tërhequr sasinë dhe llojet e mbetjeve të krijuara nga anijet që përdorin në portin ku do të ankorojnë, normalisht dhe tepricat nga ngarkesat e tyre, duke marrë parasysh nevojat fuksionale të përdoruesve të portit, madhësinë dhe pozicionin gjeografik të portit, llojin e anijeve që japin shenjën e thirrjes në atë port dhe të garantojnë trajtimin e këtyre mbetjeve në imjantet e tyre të çertifikuar dhe të liçensuara sipas legjislacionit mjedisor në fuqi dhe standarteve dhe normave të lejuara Europiane.

Me hyrjen në fuqi për zbatim të këtij akti, Drejtoria e Përgjithshme Detare do të paraqesë çdo vit në Ministrinë përgjegjëse për mjedisin dhe në Ministrinë përgjegjëse për transportin, raportimin mbi zbatimin e kësaj rregullore.

Kjo rregullore është në përputhshmëri të plotë me legjislacionin aktual mjedisor dhe atë detar në Shqipëri, si dhe e harmonizuar me legjislacionin ndërkombëtar në këtë fushë.

Parashikohet që rregullorja të hyjë në zbatim brenda 6 mujorit të parë të vitit 2016-të, pas miratimit të tarifës nga Ministria e Financave.