Vlorë, Basha: 5 prioritet e PD-së për zhvillimin e ekonomisë
-“Shqipëria, në raport me vendet e tjera të rajonit, është e fundit për sa i përket pëlqyeshmërisë nga bizneset. Shkaqet janë mungesa e politikave ekonomike, politika plotësisht e gabuar fiskale dhe korrupsioni”, ka deklaruar sot kryetari i Partisë Demokratike, Lulzim Basha në takim sot me përfaqësues të biznesit në Vlorë, ndërsa ka prezantuar 5 prioritet e PD për zhvillimin e ekonominë.
Basha u shpreh se nuk ka ardhur të bëjë fushatë elektorale. “Natyrisht turi që po bëj nëpër Shqipëri është për protestën e 16 shkurtit, por bashkëbisedimi me ju po e bëj në një kuadër shumë më të thellë. Jam jashtëzakonisht i shqetësuar për gjendjen ekonomike në Shqipëri”, tha ai.
Më tej, Basha u tha përfaqësuesve të biznesit se vizioni i PD-së për të ringjallur ekonominë përbëhet nga 3 shtylla kryesore.
“Ne kemi një vizion mbi të cilin do të bazojmë politikat tona ekonomike. Ky vizion përbëhet nga 3 shtylla kryesore: Çlirimi i tregut nga monopolet, oligarkia dhe korrupsioni. Një politikë fiskale, e cila do të nxisë prodhimin dhe punësimin si objektivi ynë numër një. Orientimi nga prioritet e ekonomisë shqiptare”, tha ai.
Po ashtu, Basha ka prezantuar 5 prioritet e PD për zhvillimin e ekonomisë që janë turizmi, për të mos pasur në çdo cep të bregut nga një klient të qeverisë; energjetika, teknologjia e informacionit, bujqësia dhe agro-turizmi, logjistika.
“PD është parti pro sipërmarrjes, sepse objektivi ynë numër 1 është punësimi. Sa më shumë vende pune do të jeni në gjendje të krijoni, aq më mirë do t’ju mbajmë. Këto janë 5 prioritetet sipas vizionit tonë. Asgjë nuk është e shkruar në gur. Kjo tavolinë dhe shumë të tjera si kjo kanë këtë qëllim, ta ndajmë këtë vizion me ju, ta pasurojmë me ju dhe të keni nesër një qeveri që nuk ju vë shkelmin në fyt, por ju shtrin dorën”, ka shtuar ai.
“Ky është objektivi ynë, ky është vizioni i Partisë Demokratike dhe qendrës së djathtë me mbështetjen edhe të aleatëve tanë europianë për të nesërmen e ekonomisë shqiptare”, ka thënë ai.
