Vlorë: Digjet automjeti i gazetarit, Genti Bellaj

Persona të paidentifikuar dogjën natën, duke u gdhirë e martë, automjetin e gazetarit të Televizionit “Ora News” për Vlorën, Genti Bellaj.

Ngjarja ndodhi rreth orës 02.30 të të martës, në lagjen “Lirim”, ndërkohë që automjeti tip “Lancia”, ishte parkuar pranë banesës së Bellajt. Paraprakisht mendohet se, autorët kanë përdorur për të realizuar qëllimin e tyre, lëndë djegëse, çka bëri që flakët të digjnin gjithçka brenda pak minutash.

Policia nisi një hetim për këtë ngjarje, ndërkohë që ka marrë në pyetje edhe Bellajn.

Në një prononcim për ATSH-në, gazetari i “Ora News”, e lidh këtë ngjarje vetëm me motivet që kanë të bëjnë me profesionin që ushtron.

“Nuk ka asnjë motiv tjetër përveçse punës së gazetarit, nuk kam patur ndonjë përplasje, apo konflikt me persona të caktuar. Ishte automjeti që përdorja për të bërë punën”, thotë Bellaj. Ai shpreh keqardhjen për këtë ngjarje.

Vetëm 3 vjet më parë ai u përball me një tjetër rast të ngjashëm, kur në muajin shkurt të vitit 2011, automjeti i tij u përfshi nga flakët në të njëjtin vend.