Vrasja e ish-policit Santiago Malko, Apeli i GJKKO lë në fuqi dënimin me 28 vite burg për Ilir Selmanin

Apeli i GJKKO ka shpallur këtë të premte vendimin për Ilir Selmanin, duke lënë në fuqi dënimin e tij me 28 vite burgim.

Selmani akuzohet si pjesë e grupit kriminal që organizoi dhe ekzekutoi vrasjen e ish-policit Santiago Malko, një ngjarje e rëndë e ndodhur në vitin 2019.

Çështja ndaj tij u kthye më herët për rigjykim në Shkallën e Dytë nga Gjykata e Lartë, e cila vendosi që procesi të rishikohej edhe një herë në Apel. Megjithatë, pas shqyrtimit, Apeli i GJKKO-s ka vendosur të mos ndryshojë masën e dënimit të dhënë më parë.

Gjatë seancës së sotme ku u shpall vendimi, Ilir Selmani nuk u paraqit fizikisht. Pas këtij vendimi të formës së prerë nga Apeli, ai pritet të transferohet nga masa e sigurisë “arrest shtëpie”, në të cilën ndodhej, për t’u dërguar në një burg të sigurisë së lartë.

Ilir Selmani është shpallur fajtor nga Shkalla e Parë si pjesë e të ashtuquajturit “Klani Duka”, grup që sipas akuzës organizoi dhe ekzekutoi ish-policin Santiago Malko në gusht të vitit 2019 në Tiranë. Malko konsiderohej krahu i djathtë i Ervis Martinajt, i cili rezulton i zhdukur prej vitit 2022.

Disa ditë më parë pranë banesës së tij, e cila ruhet nga forca të shumta policie, u arrestua me armë Emiljano Nina, i konsideruar si një person me lidhje të ngushta me grupin e Ervis Martinajt. Ky zhvillim ka bërë që hetuesit të dyshojnë se mund të ishte planifikuar një atentat për hakmarrje.