Vrasja në Gjirokastër, Alibeaj: Policia nuk mori asnjë masë

Partia Demokratike e cilësoi vrasjen e dy ditëve me parë në Gjirokastër si të paralajmëruar dhe akuzoi drejtuesit e policisë së këtij qarku se kanë krijuar të gjitha lehtësitë për autorin që t’i ikte arrestimit.

“Autori i vrasjes, Endri Lluka, një person me precedent penal, bridhte lirshëm me pistoletë në qytet dhe kërcënonte fshatarët e zonës ku dyshohet se kishte parcelat e tij me kanabis. Ndaj tij kishte dhe kallëzim për kërcënimet dhe shqetësimet që krijonte, por policia nuk ka marrë asnjë herë masa”, deklaroi kreu i Departamentit të Rendit dhe Sigurisë në PD, Enkelejd Alibeaj.

Alibeaj tha se policia nuk ngriti asnjë postbllok për kapjen e autorit dhe kur drejtuesit e PD në Gjirokastër i kërkuan sqarime drejtorit të Policisë së Qarkut se përse nuk janë ngritur postblloqet, ky i fundit nuk u përgjigj se “nuk i jepte kujt llogari”.

“Kjo ngjarje, tregon inkriminimin e pikave kyçe të policisë, lidhjet e tyre me personat me rrezikshmëri të lartë, me trafikantë dhe me vrasës, dhe dëshmon animin e shtetit në krah të banditëve, dhe kundër qytetarëve”, shtoi Alibeaj.

Në fund, Partia Demokratike i kërkon prokurorisë të hetojë menjëherë për të gjitha ato që i quan lehtësi që i janë krijuar vrasësit dhe mosveprimet që sollën ngjarjen e rëndë kriminale.