Vuçiç në Nju Jork me Vadefulin dhe Lavrovin: Bisedime për marrëdhëniet me Gjermaninë dhe Rusinë dhe situatën në rajon

Presidenti i Serbisë, Aleksandër Vuçiç, zhvilloi sot një sërë takimesh diplomatike në selinë e Organizatës së Kombeve të Bashkuara në Nju Jork, në kuadër të sesionit të 81-të të Asamblesë së Përgjithshme të OKB-së. Ai u takua me ministrin e Jashtëm të Gjermanisë, Johan Vadeful, si dhe me ministrin e Jashtëm të Rusisë, Sergej Lavrov.

Përmes një njoftimi në llogarinë e tij në Instagram (buducnostsrbijeav), Vuçiç bëri me dije se takimi me homologun gjerman ishte një “bisedë e rëndësishme dhe përmbajtësore”, ku u diskutua për marrëdhëniet dypalëshe Serbi–Gjermani, rrugën evropiane të Serbisë dhe çështjet me rëndësi kyçe për stabilitetin e rajonit.

Sipas njoftimit, në qendër të bisedimeve ishte edhe situata në Kosovë, nevoja për ruajtjen e paqes dhe stabilitetit në rajon e në Evropë, si dhe roli i OKB-së në ruajtjen e paqes ndërkombëtare, sigurisë dhe respektimit të së drejtës ndërkombëtare.

Vuçiç u takua gjithashtu në selinë e OKB-së me ministrin e Jashtëm rus, Sergej Lavrov, ndonëse për përmbajtjen e kësaj bisede nuk janë dhënë detaje të mëtejshme.

Vizita në Nju Jork vjen pasi presidenti serb mbajti fjalimin e tij në Debatin e Përgjithshëm të Asamblesë së Përgjithshme, ndërsa agjenda e tij përfshin edhe takime të tjera bilaterale me liderë botërorë në margjinat e sesionit të 81-të.

Burimi: RTS