Vuçiç sulmon aktorët që mbështesin listën studentore: „Edhe Taylor Swift nuk i ndihmoi demokratët në SHBA“

Aleksandar Vuçiç, kreu i listës së koalicionit qeverisës rreth Partisë Progresive Serbe (SNS), i ka vazhduar sulmet ndaj kundërshtarëve në fushatën parazgjedhore, duke dënuar kësaj radhe grupin e aktorëve të njohur që u shfaqën në spotin zgjedhor të listës studentore „Studentët fitojnë“, siç njofton BBC News në gjuhën serbe.

Vuçiç veçanërisht sulmoi aktoren Jelena Stupljanin, aktive në protestat kundër qeverisë muajt e fundit, për shkak të videos ku ajo kritikoi kolegun e saj më të vjetër, Predrag „Miki“ Manojloviqin, për mbështetjen që i dha Vuçiçit. „A mendon ajo vërtet se është një lloj madhesie morale, intelektuale, aktoriale për një gjigant si Miki Manojloviqi?“, tha Vuçiç në një video-mesazh.

„Njerëzit mendojnë se do të votohet për dikë vetëm sepse zonja (Katarina) Radivojeviq voton për dikë. Kjo mund të jetë një votë e refuzueshme, por nuk mund të sjellë asnjë votë. Nuk e mësuan se as Taylor Swift, një nga këngëtaret më të popullarizuara në botë, dhe të tjerët nuk e ndihmuan Partinë Demokrate ta munde (Donald) Trumpin në zgjedhjet në Amerikë“, deklaroi Vuçiç, siç citohet nga BBC News në gjuhën serbe. Si në listën e SNS-së, ashtu edhe në listën studentore ka aktorë kandidatë për deputetë, vëren BBC.

Në tubimin parazgjedhor në Zrenjanin, Vuçiç i quajti zgjedhjet e parakohshme parlamentare të 25 tetorit vendimtare dhe tha se synon fitoren „me diferencë më shumë se gjysmë milioni votash“. Ai i akuzoi sërish kundërshtarët, pa prova, se marrin ndihmë nga jashtë: „Ne më 25 tetor zgjedhim nëse ne si qytetarë do ta drejtojmë këtë vend, apo dikush nga jashtë. Nëse doni që të drejtojë dikush nga jashtë, atëherë votoni për plenumet“, tha ai.

Vuçiç i quajti figurat në listën studentore „kadra të konsumuara të DOS-it që e shkatërruan vendin“ dhe pohoi se „njerëzit më të korruptuar i vendosën në listë për të na shpjeguar se si duhet të duket shteti“, pa paraqitur prova, vëren BBC. Ai pohoi gjithashtu se atij „nuk i janë gjetur llogari jashtë vendit“: „Jo, sepse ju kam shërbyer me besnikëri. Nëse na mbështesni, me besnikëri do t’ju shërbej edhe në vitet që vijnë. Do t’ju shërbej juve, e jo të huajve që duan ta shkatërrojnë vendin tonë“, tha ai, duke njoftuar se nëse lista e tij merr shumicën do të bëhet kryeministri i ri i Serbisë.