Ymeri në Washington bisedon për zhvillimet politike në Kosovë

Gjatë ditës së parë të vizitës në Washington, kryetari i Lëvizjes Vetëvendosje, Visar Ymeri, pati disa takime bashkë me anëtarin e Këshillit të Përgjithshëm, Florin Krasniqi. Ata u takuan me kongresmenin Robert Aderholt, i cili është njëkohësisht Bashkëdrejtues i Grupit të Çështjeve Shqiptare (“Albanian Caucus”), në Kongresin e SHBA-së.

Në këtë takim u diskutuan zhvillimet politike dhe ekonomike në Kosovë me theks të veçantë te dialogu në Bruksel, “Zajednica” e komunave me shumicë serbe në Kosovë, Gjykata Speciale, si dhe degradimi ekonomik e social që po i ndodh Kosovës vazhdimisht.

Ymeri dhe Krasniqi e njoftuan kongresmenin Aderholt për rrezikun që i kanoset Republikës së Kosovës dhe të ardhmes së saj nga një asociacion komunash me kompetenca ekzekutive, si dhe për votimin e Kuvendit të Republikës së Kosovës kundër amendamentit kushtetues për themelimin e Gjykatës Speciale.

Përfaqësuesit e Vetëvendosjes po ashtu kërkuan nga kongresmeni Aderholt që të angazhohet dhe t’i përcjellë zhvillimet rreth dialogut dhe “Zajednicës” së Komunave me Shumicë Serbe në mënyrë që të mos lejohet themelimi i një niveli të tillë pushteti të tretë në Kosovë që do ta çimentonte ndërhyrjen e vazhdueshme politike e institucionale të Serbisë në Kosovë.

Përfaqësuesit e Vetëvendosjes po ashtu kanë takuar zyrtarë të zyrës së Senatorit Gary Peters nga shteti Michingan. Në mbrëmje Ymeri dhe Krasniqi u takuan për darkë me ambasadorin William Walker, me të cilin diskutuan veçanërisht për Gjykatën Speciale dhe për gjendjen ekonomike e sociale të qytetarëve të Kosovës, dhe tendencën e tyre në rritje për ta lëshuar Kosovën dhe për të jetuar në vende të tjera.

Delegacioni i Vetëvendosjes po vazhdon takimet në Washington DC me kongresmenë dhe zyrtarë të tjerë amerikanë.