Zelensky: Ukraina do t’i ndalë sulmet ndaj rafinerive ruse nëse Rusia ndalon goditjet ndaj infrastrukturës sonë energjetike

Presidenti ukrainas Volodymyr Zelensky deklaroi të dielën se Ukraina është gati të ndalë sulmet ndaj rafinerive ruse të naftës, nëse Rusia ndalon goditjet ndaj infrastrukturës energjetike të Ukrainës — duke i kthyer përgjigje presionit të presidentit amerikan Donald Trump.

Deklarata u dha përmes rrjetit social X, siç njofton Reuters, ku Zelensky u shpreh se “Ukraina do të jetë gati të ndalë sulmet ndaj rafinerive ruse të naftës nëse Rusia ndalon goditjet ndaj infrastrukturës sonë energjetike”. Sipas tij, “është e mundur që sulmet ndaj infrastrukturës energjetike të ndalen që sot, por Putini nuk dëshiron ta bëjë këtë”. Presidenti ukrainas theksoi se çdo hap de-përshkallëzimi duhet të jetë reciprok dhe i shoqëruar me garanci reale.

Zelensky tha se do të vazhdojë bisedimet me liderët evropianë edhe të dielën, me diskutime të përditshme për paketa shtesë të mbrojtjes ajrore, përfshirë edhe municion për avionët luftarakë. “Kjo e vërtetë e luftës në Evropë është Rusia dhe vetëm Rusia”, shkroi ai, duke theksuar se përgjegjësia për luftën bie vetëm mbi Rusinë.

Deklaratës së Zelenskyt i parapriu kundërpërgjigjja e ministrit të Jashtëm ukrainas Andrii Sybiha ndaj Trump-it, të shtunën vonë në X, siç raporton AP. Sybiha tha se Zelensky po udhëheq vendin në luftën për pavarësi, se “ka mbështetjen e popullit ukrainas dhe ata kanë të drejtën të vendosin”, dhe se deklaratat nga jashtë “vetëm konfirmojnë se ai po bën punën e tij mirë”.

Konteksti i përplasjes lidhet me deklaratat e së shtunës nga presidenti amerikan Donald Trump, i cili tha se “ka ardhur koha që Ukraina të ketë një president të ri” dhe i kërkoi Zelenskyt të ndalë goditjet ndaj rafinerive ruse — “he better damn well stop” — duke e fajësuar liderin ukrainas për çmimet e larta të dizelit. Trump ka arritur një marrëveshje me presidentin rus Vladimir Putin për blerjen e dizelit rus, pavarësisht sanksioneve.

Ndërkohë, intensiteti i sulmeve ruse mbetet i lartë: gjatë javës së kaluar, Rusia ka lëshuar rreth 1,450 bomba ajrore të drejtuara, 75 raketa dhe mbi 1,640 dronë sulmues ndaj Ukrainës. Në Zaporizhzhia, operacionet e kërkim-shpëtimit pas bombardimit të së shtunës kanë përfunduar: 23 persona u vranë, përfshirë katër fëmijë, dhe mbi 30 u plagosën — tetë prej tyre ende në spital.