Zgjedhjet 2017 / Nga Ben Blushi te Mesila Doda, ja deputetët që mbetën jashtë parlamentit
Nga rezultatet e deritanishme, PD-ja është duke humbur në këto zgjedhje. Megjithatë një tjetër “humbje” PD-ja e ka pësuar brenda radhëve të saj.
Shumë emra të njohur të selisë blu nuk kanë mundur të marrin mandatin për të qenë pjesë e Kuvendit. Arben Ristani, që është numri 2 i PD-së, nuk ka mundur ta marrë mandatin në Vlorë.
Agron Duka nuk e ka marrë mandatin e tij, duke u renditur i pesti në Durrës, megjithatë shpresat e tij kanë qenë për kutitë e Shijakut.
Edhe kandidati për Tiranën Gert Bogdani, me numërimin e më shumë se gjysmës të kutisë, mbetet jashtë parlamentit.
Preç Zogaj, i renditur i katërti në listën e PD-së për qarkun e Lezhës, rrezikon që të mos marrë mandatin e deputetit. Në këtë qark PD-ja aktualisht ka siguruar tre mandate.
Edhe deputeti i Beratit, Astrit Veliaj, nuk e ka marrë mandatin e tij në qark. Ajo që bie në sy është edhe mungesa e Shpëtim Idrizit dhe Mesila Dodës, e cila kandidonte e dyta në Tiranë.
Deputetja e PDIU-së nuk ka mundur të marrë një mandat. Edhe Ben Blushi, kreu i partisë LIBRA, nuk do të jetë në parlament.
