Zgjedhjet serbe, pa incidente – opozita kundërshtoi mbajtjen e tyre

Vendvotimet për zgjedhjet parlamentare të Serbisë të mbajtura edhe në Kosovë, në mjediset e banuara me qytetarë serbë, tashmë janë mbyllur.

Si bartës i procesit të zgjedhjeve parlamentare serbe të zhvilluara të dielën në Kosovë, Misioni i Organizatës për Siguri dhe Bashkëpunim Evropian në Kosovë, (OSBE), ka njoftuar deri në ora 18, kanë votuar 37. 901 votues ose 35. 28 për qind e votuesve me të drejtë vote.

Sipas njoftimeve zyrtare, në Kosovë kanë qenë të hapur 90 qendra votimi dhe disa vendvotime në 21 lokacione. Në listën e Komisionit Zgjedhor të Serbisë, në Kosovë kanë qenë të regjistruar si votues 106.094 veta.

Sipas marrëveshjes që ka të bëjë me mbajtjen e zgjedhjeve të Serbisë në Kosovë, OSBE, materialin zgjedhor e bartë për në Rashkë dhe Vranje të Serbisë, ku i dorëzohet Komisionit Zgjedhor Republikan të Serbisë.

Misioni i OSBE-së kishte pasur një rol të njëjtë në Kosovë edhe në zgjedhjet parlamentare të Serbisë më 2012 dhe 2014.

Kurse, për të ruajtur rendin dhe qetësinë publike, ka qenë e angazhuar Policia e Kosovës, e cila gjithashtu kaofruar asistencë për OSBE-në.

Zyrtarë të Policisë së Kosovës, kanë bërë të ditur për Radion Evropa e Lirë se nuk është shënuar ndonjë incident që do të ndikonte në zhvillimin normal të procesit zgjedhor.

Zëvendësdrejtori rajonal i Policisë së Kosovës për pjesën veriore, Besim Hoti, bërë të ditur se i gjithë procesi i votimeve është zhvilluar normalisht.

“Sa i përket punës policore, në katër komunat veriore, përkatësisht në drejtoritë rajonale në veri nuk kemi regjistruar asnjë incident, i cili do të ndikonte në çfarëdo lloje forme në situatën e sigurisë së përgjithshme”, ka thënë Hoti

Zgjedhjet parlamentare të Serbisë, të cilat janë praktikuar të mbahen edhe në Kosovë, bazohen në të drejtën e shtetësisë së dyfishtë të serbëve të Kosovës.

Mbajtja e zgjedhjeve parlamentare serbe në Kosovë, gjatë ditës ishte kundërshtuar nga partitë politike opozitare, duke e cilësuar si shkelje të Kushtetutës së Kosovës, si dhe në kundërshtim me përpjekjet për integrimin e pakicës serbe në institucionet e Kosovës.

Nëpërmjet një komunikate për media, përfaqësuesit e Lëvizjes Vetëvendosje, mbajtjen e zgjedhjeve të Serbisë në territorin e Kosovës, e kanë cilësuar si jo kushtetuese.

“Serbia, me këto zgjedhje do ta rikonfirmojë praninë e saj në Kosovë, dhe njëkohësisht në praktikë ta jetësojë qëndrimin e saj se Kosova është pjesë e Serbisë. Nuk ka dyshim që zgjedhjet e Serbisë në Kosovë, duke qenë në përputhje me Kushtetutën e Serbisë, janë në kundërshtim të plotë me Kushtetutën e Republikës së Kosovës. Në bazë të Kushtetutës, Republika e Kosovës është shtet i pavarur, sovran, demokratik, unik, dhe i pandashëm”.

“Zgjedhjet e vetme që mund të mbahen në territorin e Republikës së Kosovës janë zgjedhjet për institucionet qendrore apo lokale të Republikës së Kosovës”, thuhet në një njoftim dërguar për media nga Lëvizja Vetëvendosje.

Lëvizja Vetëvendosje, konsideron se Qeveria e Kosovës ka dështuar t’i kryejë detyrat e veta shtetërore, derisa ka lejuar mbajtjen e zgjedhjeve parlamentare serbe në Kosovë.

Edhe Aleanca për Ardhmërinë e Kosovës, ka theksuar se votimet për zgjedhjet parlamentare të Serbisë edhe në Kosovë, janë të papranueshme.

“Qëndrimi i institucioneve të Republikës së Kosovës, për të lejuar që të votohet në Kosovë për zgjedhjet e një shteti tjetër, është shkelje e rëndë e sovranitetit dhe Kushtetutës së vendit”.

“Kjo është një goditje edhe për përpjekjet për integrimin e pakicës serbe në institucionet e Kosovës. Koncesionet që Qeveria e Kosovës po i bën Qeverisë së Serbisë, siç janë edhe votimet në Kosovë, për zgjedhjet e Serbisë, janë edhe kundër vetë interesit të popullatës serbe”, thuhet në reagimin e AAK-së, dërguar medieve.

Edhe subjekti politik, Nisma per Kosoven, ka reaguar ndajmbajtjes së zgjedhjeve parlamentare të Serbisë edhe në Kosovë.

“Lejimi nga ana e institucioneve të vendit tonë, që të votohet në Kosovë për zgjedhjet e një shteti tjetër, është shkelje e rëndë e Kushtetutës së Kosovës. Ky veprim është, po ashtu, në kundërshtim me përpjekjet e vendit tonë për integrimin e pakicës serbe në institucionet tona”, thuhet në komunikatën e Nismës për Kosovën.

E, një ditë para mbajtjes së këtyre zgjedhjeve, kryeministri i Kosovës, Isa Mustafa, duke folur për këtë proces, kishte theksuar, se në Kosovë do të ketë vetëm grumbullim të votave nga qytetarët serbë të Kosovës, për zgjedhjet në Serbi.

“Nuk flitet për zgjedhje klasike të Serbisë në Kosovë, por vetëm për grumbullim të votave nga serbët në Kosovë, të cilët kanë dyshtetësi, sepse edhe në të gjitha vendet tjera, qytetarët që kanë dyshtetësi, kanë të drejtë që të votojnë. Këtë të drejtë edhe ne ua kemi siguruar me Kushtetutë”, kishte thënë Mustafa.

Kryeministri Mustafa kishte shtuar se nuk do ta lejonin që dikush nga Serbia të organizojë vendvotime në Kosovë.

Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.