Zgjedhjet SHBA, Obama komenton vendimin e FBI “Nuk operohet përmes dyshimeve, kam besim tek Clinton”

Presidenti amerikan, Barak Obama ka folur për herë të parë rreth vendimit të FBI për të rihapur hetimet rreth skandalit të emaileve të Hilari Klinton. Sipas tij FBI nuk duhej të operonte përmes dyshimeve. Ndërsa ka theksuar se ka besim të plotë tek kandidatja Demokrate.

Për presidentin e Shteteve të Bashkuara, skandali me e-mailet e Hilari Klinton është “Fryrë”. Bëhet fjalë për komentin e parë të Barak Obamës rreth çështjes që ka rihapur zgjedhjet e 8 Nëntorit dhe ka penalizuar kandidaten Demokrate. Aktualisht kreu i Shtëpisë së Bardhë nuk ka sulmuar drejtëpërdrejtë FBI dhe kreun e saj, Xhejms Komei, i cili vendosi që të zbulojë një çështje jo shumë të qartë pak ditë përpara zgjedhjeve.

Presidenti amerikan ka rikujtuar se ekziston një normë në hetime, në të cilën “Nuk operohet përmes dyshimve dhe me informacione jo të plota si dhe nuk operohet me shpërndarje lajmesh”. Obama theksoi se përpara hetimeve të reja të nisura nga FBI nuk kishte gjetur ndonjë shkelje të ligjit në e-mailet e Klinton.

Në fund presidenti ka shtuar se votuesit e rinj “Dëgjojnë gjithë këto zhurma” dhe pyesin veten nëse duhet të shqetësohen me sjelljen e Klinton. Ndërsa nënvizon se ka besim të plotë tek ish-sekretarja e shtetit. Në këto ditë të fundit që i kanë mbetur në drejtim të Shtëpisë së Bardhë, Obama do të bëjë fushatë për kandidaten Demokrate.