Zjarr i madh në hotelin ‘Club A’ në Kopaonik — flakët përfshinë gjithë objektin

Një zjarr i madh shpërtheu rreth mesnate në hotelin “Club A” në qendrën turistike të Kopaonikut, siç njofton gazeta Danas. Objekti, i cili ndodhej në fazën përfundimtare të rinovimit, u përfshi plotësisht nga flakët brenda një kohe të shkurtër.

Sipas raportimit të Radio-Televizionit të Serbisë (RTS), zjarri kishte përfshirë të gjithë objektin e hotelit, ndërsa gazetarët e RTS-së nga terreni raportuan për flakë dhe tym të dendur që përhapeshin nëpër gjithë godinën.

Në vendin e ngjarjes ndërhynë menjëherë ekipet zjarrfikëse nga Rashka dhe Kopaoniku, të cilat u angazhuan me forca të shtuara për të vënë nën kontroll flakët. Megjithatë, në orët e mëngjesit, rreth orës 7-8, zjarri ende nuk ishte shuar plotësisht.

Hoteli “Club A” nuk ishte në funksion për turistë, pasi punimet e rinovimit ishin drejt përfundimit. Shkaku i zjarrit ende nuk dihet dhe pritet të zbardhet nga hetimet e organeve kompetente.

Nga burimet jozyrtare nuk raportohet për të lënduar si pasojë e zjarrit. Zjarrfikësit vazhduan punën edhe në orët e paradites për shuarjen e vatrave të fundit dhe sigurimin e zonës përreth.