Zjarr në nënstacionin elektrik në Berlin, policia nis hetimet

Një zjarr ka shpërthyer herët të hënën në një kantier ndërtimi në qendër të Berlinit dhe është përhapur në një nënstacion elektrik aty pranë, ndërsa policia po heton nëse incidenti ishte i qëllimshëm apo pasojë e një defekti teknik.

Zjarri u raportua gjatë natës në Bissingzeile, në zonën Tiergarten. Rreth 50 zjarrfikës u angazhuan për shuarjen e flakëve, ndërsa policia mbylli një zonë të gjerë përreth vendngjarjes. Departamenti i hetimeve penale ka nisur verifikimet për të përcaktuar shkakun e zjarrit.

Ndërkohë, policia gjermane zhvilloi një operacion të madh në një tjetër nënstacion elektrik, në Niederrhein të Weselit, në North Rhine-Westphalia. Sipas mediave lokale, autoritetet gjetën një vrimë të prerë në gardhin e sigurisë, çka ngre dyshime se persona të paidentifikuar mund të kenë hyrë në kompleks.

Një helikopter policie monitoroi zonën ndërsa efektivët kontrolluan objektin. Deri tani, policia nuk ka konfirmuar nëse pajisjet teknike të nënstacionit janë dëmtuar apo manipuluar.

Dy incidentet ndodhin në një kohë kur autoritetet gjermane janë në kërkim të një 48-vjeçari nga North Rhine-Westphalia, i dyshuar për një seri aktesh sabotimi ndaj rrjetit elektrik të vendit që nga java e kaluar.

Hetuesit publikuan të shtunën një njoftim me fotografi të të dyshuarit dhe u kanë bërë thirrje qytetarëve që të ndihmojnë me çdo informacion që mund të çojë në identifikimin dhe lokalizimin e tij.