Zjarri në Krujë, Ministrat Nufi dhe Lamallari: Po kryhet ndërhyrje nga toka dhe ajri për shuarjen e flakëve

Ministrat Ermal Nufi dhe Besfort Lamallari kanë mbërritur në Krujë për të ndjekur nga afër situatën e krijuar nga zjarri që ka përfshirë zonën e Abazës që prej pasdites.

Ministri i Mbrojtjes, Ermal Nufi, bëri me dije se zjarri dyshohet se është shkaktuar nga dora e njeriut dhe se operacioni për shuarjen e tij po zhvillohet në mënyrë të koordinuar nga toka dhe ajri.

“Në zonën e Abazës në Krujë, bashkë me kolegun Besfort Lamallari, Drejtorin e AKMC dhe Drejtorin e Përgjithshëm të Zjarrfikësve duke ndjekur nga afër situatën e zjarrit të shkaktuar fatkeqësisht nga dora e njeriut.

Që prej pasdrekes, po punohet intensivisht me mbështetje nga ajri me 3 helikopterë të Forcës Ajrore, bashkë me forcat operacionale të strukturave vendore”.

Ministri gjithashtu shprehu mirënjohjen për pilotët e Forcës Ajrore dhe zjarrfikësit që po punojnë për izolimin e vatrës dhe mbrojtjen e banesave që mund të rrezikohen nga flakët.

“Shumë mirënjohje dhe respekt për pilotët e forcës ajrore dhe efektivët MZSH Krujë, Kamëz, Tiranë dhe Vorë, të cilët po punojnë pa ndërprerje për izolimin e vatrës dhe mbrojtjen e banesave të rrezikuara.

Për shkak të terrenit të thepisur dhe vështirësisë së ndërhyrjes nga toka, operacioni po zhvillohet në mënyrë të koordinuar nga toka dhe ajri, me synim vënien sa më shpejt nën kontroll të zjarrit”, shkruan Nufi.