12 persona humbin jetën nga sulmet izraelit në Liban, mes tyre edhe fëmijë

Të paktën 12 persona humbën jetën nga sulmet ajrore izraelite në jug të Libanit, sipas Ministrisë së Shëndetësisë së vendit, pavarësisht se armëpushimi mes Izraelit dhe Hezbollahut vazhdon të jetë zyrtarisht në fuqi.

Sulmet ndodhën në një moment kur SHBA po përpiqet të rifillojë kontaktet diplomatike mes palëve. Një zyrtar i Departamentit Amerikan të Shtetit bëri të ditur se më 14 dhe 15 maj do të zhvillohen bisedime në Washington, D.C. me synimin për të hapur rrugën drejt negociatave më të gjera për paqe.

Sipas autoriteteve libaneze, avionët izraelitë goditën disa komunitete në zonën e Nabatieh, pasi më herët ishin lëshuar paralajmërime për evakuimin e civilëve.

Ministria e Shëndetësisë e Libanit raportoi se 11 persona, mes tyre edhe dy fëmijë, u vranë në tre fshatra të rajonit. Një tjetër viktimë ishte një anëtar i ekuipazhit të ambulancës së Islamic Health Committee, i cili humbi jetën në një sulm në zonën e Marjayoun. Një tjetër punonjës i ekipeve të shpëtimit mbeti i plagosur.

Vetëm një ditë më parë, 11 persona të tjerë u vranë nga bombardimet izraelite në jug dhe lindje të Libanit.